Vendet e QUINT-it dhe Zyra e BE-së të shqetësuara nga vendimi për heqjen e licencës së "Klan Kosovës"
Ambasadat e vendeve të QUINT-it si dhe Zyra e BE-së në Kosovë kanë reaguar lidhur me vendimin e Ministrisë së Industrisë, Ndërmarrësisë dhe Tregtisë (MINT) që konfirmon pezullimin e licencës së biznesit të televizionit “Klan Kosova”.
Në reagimin e përbashkët, ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara, si dhe Bashkimi Evropian në Kosovë shprehin shqetësimin e tyre të thellë për këtë vendim të MINT.
“Jemi veçanërisht të shqetësuar se heqja e licencës së biznesit të Klan Kosovës është një vendim joproporcional që do të ketë pasoja në pluralizmin mediatik në Kosovë” -thuhet në reagim.
Sipas QUINT-it dhe Zyrës së BE-së, revokimi i licencës së çdo medie është një hap domëthënës që kërkon shqyrtim rigoroz.
“Liria e shprehjes dhe informimit janë tipare thelbësore të shoqërive demokratike. Presim një proces ligjor të drejtë dhe transparent për zgjidhjen e situates” – thuhet tutje në reagim.
Sipas njoftimit të MINT, këtë vendim e ka marrë komisioni për shqyrtimin e ankesave për regjistrimin e bizneseve.
Vendimin e Ministrisë e ka kritikuar Asociacioni i Gazetarëve të Kosovës (AGK).
“AGK-ja, beson se ky proces që nga fillimi ka qenë i motivuar politikisht nga partia në pushtet dhe Qeveria e Kryeministrit Kurti, në përpjekje për të mbyllur televizionin më të madh privat në vend » – thuhet, ndër të tjera, në reagimin e AGK-së.
Në një reagim të saj, presidentja e vendit, Vjosa Osmani, ka kërkuar të sqarohet çdo dilemë ligjore rreth rastit të licencës së ‘Klan Kosovës’.
Ndërsa, ministrja Rozeta Hajdari e ka mbrojtur vendimin e Ministrisë që e drejton ajo.