Avokati e quan spektakël arrestimin e drejtorit të Ramiz Lladrovcit
Avokati i drejtorit të Infrastrukturës në Komunën e Drenasit, Nasuf Hasani i ka quajtur të pasakta pretendimet se Idriz Hysenaj ka keqpërdorur pronat e Komunës.
Sipas avokatit, Hysenaj është përfitues i tenderit për ndërtimin e ati objekti banesor, pasi që në vitin 2008 e ka marr për periudhën për 99 vite pastaj sipas tij, në vitin 2015 Komuna e Drenasit e nxjerr një vendim me të cilin e shkurton afatshmerinë koncesionare nga 99 vite në 40 vite.
“Pretendimi i Komunës së Drenasit se ato prona janë të veta është i pasaktë, sepse Idriz Hysenaj si përfitues i tenderit për ndërtimin e atij objekti banësor në vitin 2008 e ka marr për periudhën për 99 vite, pastaj në vitin 2015 Komuna e Drenasit e nxjerr një vendim me të cilin e shkurton afatshmerinë koncesionare nga 99 vite në 40 vite. Kërkesa si e tillë është një spektakël i radhës, sepse nuk kemi të bëjmë asgjë me ‘Keqpërdorim të autoritetit zyrtar’ nga ana e Idriz Hysenaj. Prandaj qysh në vitin 2015 e ka parashtrua padinë dhe jemi në pritje të trajtimit të këtij kontesti juridiko-civil”, ka thënë avokati Hasani.
KALLXO.com raportoi sot se Prokuroria Themelore e Prishtinës ka kërkuar nga Gjykata Themelore në Prishtinë që t’i caktohet masa e paraburgimit drejtorit të Infrastrukturës në Komunën e Drenasit, Idriz Hysenaj, i cili është arrestuar një ditë më parë, nën dyshimin për keqpërdorim të detyrës zyrtare.
Idriz Hysenaj dyshohet se nga viti 2014 duke e shfrytëzuar pozitën e tij zyrtare, u ka dhënë me qira qytetarëve banesat që kanë qenë në pronësi të komunës.
“Midis periudhës kohore që nga viti 2014 deri më tani në vazhdimësi si person zyrtar duke shfrytëzuar detyrën apo zutoritetin zyrtar i ka tejkaluar kompetencat e tij në atë mënyrë që në cilësinë e personit zyrtar – drejtor në Komunën e Drenasit në mënyrë të kundërligjshme dhe me qëllim të përfitimit të kundërligjshëm për vete dhe biznesin e tij ua ka dhënë me qera banesat men nr. 37, kati i 6, nr. 36, kati 6, nr. 29 kati i 5, nr.45 kati i 7, nr. 28 kati 5, nr 38 kati 6 të cilët kanë qenë pronë e Komunës së Drenasit”, thuhet në kërkesën e Prokurorisë.
Sipas Prokurorisë, këto banesa u janë dhënë për shfrytëzim personave të caktuar si Naim Kukalaj, Durim Halilaj, Labinot Bazaj, Jeton Ramaj dhe Minire Saliuku.
“Kurse në disa raste u ka dhënë në shfrytëzim banesat të cilat kanë qenë pronë e Komunës së Drenasit personave të caktuar nga të cilët kishte marr tokat e tyre për ndërtim të banesave nga ana e firmës së tij ‘Kulla Com’ deri në përfundimin e banesave.
Prokuroria më tej thekson se, në një rast tjetër, zyrtari komunal i ka ofruar në shfrytëzim banesën pronë e komunës një qytetari që kishte blerë banesë nga i dyshuari deri në përfundim të banesës që e kishte blerë.
Në këtë mënyrë, sipas Prokurorisë, i njëjti Komunës së Drenasit i kishte shkaktuar dëm të madh material, ndërsa vetes dhe kompanisë së tij i kishte sjell dobi të kundërligjshme pasurore.
Arrestimi i drejtorit të Komunës së drejtuar nga kryetari Ramiz Lladrovci vjen pak ditë pas përfundimit të fushatës zgjedhore, gjatë të cilës PDK, me kryetarin e saj dhe kandidatit për kryeministër, Kadri Veseli, e kishte shpallur prioritet luftën kundër korrupsionit dhe nepotizmit.
Kurse, kryetari i Komunës së Drenasit, Ramiz Lladrovci, pati reaguar pas arrestimit të drejtorit të Infrastrukturës, Idriz Hysenaj, duke thënë se pas pranimit të informacionit zyrtar për dyshimet për keqpërdorim të detyrës zyrtare, do te marrë vendim pa paragjykuar fajësinë apo pafajësinë e tij.
“Pas pranimit të shqetësimeve për shfrytëzim të pa autorizuar të pronave komunale, rrjedhimisht të banesave pronë të komunës, për të hequr dyshimet, kam iniciuar rastin pranë Drejtorisë për Hetimin e Krimeve Ekonomike dhe Korrupsionit në Prishtinë. Ky inicim i rastit që kam adresuar është në mesin e shumë rasteve të tjera, pa paragjykuar fajësinë apo pafajësinë e kurrkujt”, ka shkruar Lladrovci.
Minire Saliuku kishte marrë një njoftim nga komuna e Drenasit që për një javë ta lirojë banesën të cilën është duke e shfrytëzuar tash e pesë vjet.
