Foto: Kuvendi i Kosovës
Konjufca e Alford shqyrtojnë planet për të ardhmen ndërmjet Kosovës dhe MCC-së
Kryekuvendari i Kosovës, Glauk Konjufca, ka pritur në takim Zëvendëspresidentin e Operacioneve Kompakte të Korporatës së Sfidës së Mijëvjeçarit (MCC), Cameron Alford, i shoqëruar nga ambasadori i ShBA-së në Kosovë, Jeffrey Hovenier.
Kuvendi i Kosovës ka njoftuar që në takim u bisedua për bashkëpunimin aktual ndërmjet Kosovës dhe MCC-së, përfshirë çështjen e nisjes së Programit Kompakt multimilionësh për sektorin e energjisë, si dhe u shqyrtuan planet për të ardhmen dhe çështje të tjera të interesit të përbashkët.
Konjufca ka falënderuar përfaqësuesit e MCC-së, dhe theksoi rëndësinë e projekteve me ndikim pozitiv në mirëqenien e qytetarëve.
Ai ritheksoi po ashtu gatishmërinë për vazhdimin e bashkëpunimit të ngushtë edhe në të ardhmen.
Zëvendëspresidenti i MCC, Cameron Alford u shpreh i kënaqur me nivelin e bashkëpunimit dhe potencoi nevojën e angazhimit të mëtejshëm për realizimin e projekteve zhvillimore, në linjë me avancimin e kuadrit legjislativ që mbështet investimet.
Në tetor 2022, kabineti qeveritar ka themeluar grupin punues për përmbushjen e parakushteve që rrjedhin nga Marrëveshja Kompakt e Sfidave të Mijëvjeçarit (MCC).
Kosova dhe Korporata e Sfidave të Mijëvjeçarit (MCC), në ceremoninë e Kongresit amerikan kishin nënshkruar marrëveshjen e programit Kompakt mes Kosovës dhe Korporatës së Sfidave të Mijëvjeçarit (MCC).
Marrëveshja ishte planifikuar t’i sjellë Kosovës mbi 200 milionë dollarë investime në projekte në fushën e energjisë.