Begaj: Krenar që Nuk Kishte Asnjë të Vdekur nga Rriqrat

Kryetari i Komunës së Malishevës dhe kandidat për t’u rizgjedhur, Ragip Begaj, tha në tubimin përmbyllës të Nismës për Kosovën sot në Malishevë se gjatë mandatit që po përfundon kanë përfunduar 9 shkolla e çerdhen e fëmijëve dhe 4 shkolla do të përfundojnë vitin e ardhshëm.

Begaj tha se kanë realizuar edhe projekte të cilat nuk i kanë premtuar në fushatën e kaluar.

Ai premtoi ndërtimin e katër shkollave të reja, të një çerdhe tjetër e kabineteve të shkollave për të përmirsuar kushtet e mësimdhënësve dhe nxënësve.

“Premtojmë se gjatë katër viteve të ardhshme do të pajisim të gjitha shkollat me terrene sportive”, premtoi Begaj, duke shtuar se do të ketë zgjerim të rrjetit të kanalizimit, rrugëve të asfaltuara e të trotuareve.

“Jam shumë krenar që gjatë këtyre katër viteve nuk kemi pasur nevojë t’i shkojmë asnjë familje për kryeshëndosh për shkak të rriqrave”, theksoi po ashtu Ragip Begaj.

Ndërsa, kreu i Nismës për Kosovën, Fatmir Limaj, para bashkëvendasve të tij në Malishevë tha se më 2013 kishin nisur mu në Malishevë një forcë politike, e cila do të jetë zëdhënëse e njerëzve të varfër, e punëtorit, e bujkut, e djemve dhe vajzave, dhe mbi të gjitha forcë politike që do t’u qëndrojë afër të gjithë atyre njerëzve që do të tentohet t’u bëhet padrejtësi.

“Ky katërvjeçar do të jetë katërvjeçari i zhvillimit ekonomik, i boom-it ekonomik të Malishevës dhe të tërë Kosovës”, ka theksuar zëvendëskryeministri Limaj.