Gjyqi ndaj ish-krerëve të UÇK-së, dëshmitarët deklarohen para gjykatës në seancë private
Në Dhomat e Specializuara në Hagë, procesi gjyqësor ndaj ish-krerëve të Ushtrisë Çlirimtare të Kosovës (UÇK), Hashim Thaçi, Kadri Veseli, Rexhep Selimi dhe Jakup Krasniqi, po zhvillohet në sesion privat me dëgjimin e dy dëshmitarëve të Prokurorisë.
Dëshmitari i mbrojtur, me numrin 29, ka refuzuar të dëshmojë dy herë në lidhje me çështjen në fjalë, duke çuar në ndërprerjen e seancave gjyqësore.
Avokati i tij, në seancën e kaluar më 11 tetor, ka njoftuar gjykatën se klienti i tij është në një gjendje të rëndë stresi dhe nuk është i gatshëm të japë dëshmi në gjykim. Ai madje ka shprehur gatishmërinë e klientit për të pranuar burgun në vend të dëshmisë.
Kjo ka ndodhur në një moment të procesit gjyqësor kur dëshmitari duhet të japë deklarata në lidhje me çështjen në fjalë.
Dëshmitari i 29-të kishte kërkuar një muaj kohë për të përgatitur dëshminë e tij, ndërsa gjykata e kishte paralajmëruar për mundësinë e sanksioneve dhe ofrimit të ndihmës psikiatrike.
Në të njëjtën kohë, dëshmitari i 30-të me kodin W04769 është një ish-pjesëtar i UÇK-së dhe ka ofruar informacion në lidhje me strukturën komanduese të UÇK-së në Shqipëri dhe zonën e Pashtrikut. Ky dëshmitar ka dhënë deklaratën e tij në seanca të mbyllura për publikun.
Megjithëse ishte paralajmëruar që seanca e së hënës do të vijonte me dëshminë e dy dëshmitarëve të paracaktuar, gjykimi ka pësuar ndërprerje kur avokati Jeffry Roberts, mbrojtës i Rexhep Selimit, ka filluar të bëjë pyetje në sesion privat dhe më pas gjykimin vijoi në pauzë.
Hashim Thaçi, Kadri Veseli, Rexhep Selimi, dhe Jakup Krasniqi po akuzohen për krime lufte dhe krime kundër njerëzimit.
Aktakuza fillestare kundër katër të akuzuarve u konfirmua më 26 tetor 2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27 shkurt 2023.
Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.
Gjithashtu kundër tyre janë ngritur edhe pretendime për krime lufte: arrestim dhe ndalim i paligjshëm dhe arbitrar, trajtim mizor, torturë dhe vrasje e paligjshme.
Sipas aktakuzës, krimet e paraqitura u kryen më së paku prej marsit 1998 deri në shtator 1999 në disa vendndodhje në Kosovë, si dhe në Kukës dhe Cahan të Shqipërisë.
Më 10 maj 2022, gjatë paraqitjeve të tyre, të katër të akuzuarit u vetëdeklaruan të pafajshëm lidhur me akuzat e reja në aktakuzën e ndryshuar.
Më 15 dhjetor gjykatësi i procedurës paraprake ia kaloi dosjen e çështjes trupit gjykues II. Konferenca përgatitore për gjykim u mbajt më 18 janar 2023, pasuar nga Konferenca Përgatitore e Prokurorit të Specializuar më 15 shkurt.
Gjykimi filloi më 3 prill 2023 me deklaratat hyrëse të Prokurorit të Specializuar dhe të përfaqësuesit të viktimave, ndjekur nga ekipet e mbrojtjes më 4 dhe 5 prill 2023.
Në këtë çështje janë 143 viktima pjesëmarrëse.
Raportimet e tjera të KALLXO.com lidhur me këtë rast mund t’i lexoni në këtë LINK.
