Gjyqi ndaj ish-krerëve të UÇK-së, ndërpritet seanca ku ishte paraparë të dëshmonte dëshmitari i mbrojtur

Në rrethana të paqarta për publikun, Gjykata Speciale është detyruar të ndërpresë seancën e sotme të gjykimit të Hashim Thaçit, Kadri Veselit, Rexhep Selimit dhe Jakup Krasniqit, në kohën kur pritej të dëshmonte dëshmitari i 29-të në këtë proces.

Me të filluar seanca, pas betimit, dëshmitari i mbrojtur, identiteti i të cilit ishte i mbuluar, ka kërkuar një pushim për shkaqe shëndetësore dhe një avokat për këshillim.

“Nuk po ndihna mirë me shëndet… Du me u konsultu me një avokat se nuk po i kuptoj bash mirë do sene…” – tha dëshmitari i mbrojtur.

Në lidhje me këtë, Ben Emmerson, avokati i Kadri Veselit, shprehu shqetësime rreth mënyrës së ofrimit të dëshmive nga ky dëshmitar. Ai shtoi se dëshmitari në fjalë ishte paralajmëruar se në këtë rast ka rrezik për vetinkriminim.

Këtë e ka kundërshtuar prokurori i rastit, James Pache.

Pastaj, pas një vendimi të trupit gjykues, seanca u ndërpre për disa minuta.

Pas pauzës, gjykimi vazhdoi në sesion privat dhe më pas u mbyll për ditën e sotme.

Reagimet rreth deklarimit të dëshmitarit i ka ngritur qysh dje avokati Ben Emmerson, duke theksuar se dëshmitari tenton të “negociojë me Prokurorinë” në këmbim të dëshmisë.

Hashim Thaçi, Kadri Veseli, Rexhep Selimi, dhe Jakup Krasniqi po akuzohen për krime lufte dhe krime kundër njerëzimit.

Aktakuza fillestare kundër katër të akuzuarve u konfirmua më 26 tetor 2020 dhe ka pësuar disa ndryshime në vitet që kanë pasuar. Aktakuza aktualisht në fuqi u dorëzua më 27 shkurt 2023.

Secili prej të akuzuarve është akuzuar mbi bazën e përgjegjësisë penale individuale me gjashtë akuza për krime kundër njerëzimit: përndjekje, burgim, akte të tjera çnjerëzore, torturë, vrasje e paligjshme dhe zhdukje me forcë e personave.

Gjithashtu kundër tyre janë ngritur edhe pretendime për krime lufte: arrestim dhe ndalim i paligjshëm dhe arbitrar, trajtim mizor, torturë dhe vrasje e paligjshme.

Sipas aktakuzës, krimet e paraqitura u kryen më së paku prej marsit 1998 deri në shtator 1999 në disa vendndodhje në Kosovë, si dhe në Kukës dhe Cahan të Shqipërisë.

Më 10 maj 2022, gjatë paraqitjeve të tyre, të katër të akuzuarit u vetëdeklaruan të pafajshëm lidhur me akuzat e reja në aktakuzën e ndryshuar.

Më 15 dhjetor gjykatësi i procedurës paraprake ia kaloi dosjen e çështjes trupit gjykues II. Konferenca përgatitore për gjykim u mbajt më 18 janar 2023, pasuar nga Konferenca Përgatitore e Prokurorit të Specializuar më 15 shkurt.

Gjykimi filloi më 3 prill 2023 me deklaratat hyrëse të Prokurorit të Specializuar dhe të përfaqësuesit të viktimave, ndjekur nga ekipet e mbrojtjes më 4 dhe 5 prill 2023.

Në këtë çështje janë 143 viktima pjesëmarrëse.

Raportimet e tjera të KALLXO.com lidhur me këtë rast mund t’i lexoni në këtë LINK.