Ministria e Tregtise dhe Industrise. Prishtine, 03.06.15. Photo:Atdhe Mulla
MINT publikon dokumentacion në maqedonisht, pretendon se pronari i Klan Kosovës ka paraqitur Kosovën si pjesë të Serbisë
Ministria e Industrisë, Ndërmarrësisë dhe Tregtisë (MINT) ka publikuar një dokumentacion në gjuhën maqedonase, me të cilën pretendon se pronari i Klan Kosovës ka paraqitur Kosovën si pjesë të Serbisë, në regjistrimin e biznesit në Maqedoninë e Veriut.
Përmes një komunikate, MINT ka thënë se Komisioni për Shqyrtimin e Ankesave për Regjistrimin e Bizneseve, pas verifikimit të dokumentacionit në dispozicion për Klan Kosovën, ka konstatuar se vendimi i shkallës së parë ishte i drejtë dhe në përputhje me ligjet në fuqi.
“Kjo, pasi që Komisioni ka siguruar dokumentacionin aktual nga institucioni përkatës në Maqedoninë e Veriut, për “Pronarët e Vërtetë të Subjektit”, në të cilin dokumentacion ka gjetur se Kosova paraqitet përsëri si pjesë e Serbisë” – thuhet në komunikatë.
“Në bazë të këtij dokumentacioni, i cili gjendet më poshtë, Komisioni ka refuzuar ankesën e parashtruar nga pala në procedurë, duke konfirmuar të njëjtën shkelje të Kushtetutës që e ka konstatuar ARBK në shkallën e pare” – thuhet tutje.
Në fund, MINT ka thënë se çdo palë në procedurë gëzon të drejtën e ankimimit ndaj vendimeve të ARBK-së, por sipas tyre, shkeljet e Kushtetutës nuk mund të konsiderohen si çështje teknike.
Ministria e Industrisë, Ndërmarrësisë dhe Tregtisë ka refuzuar ankesën e televizionit “Klan Kosova” ndaj vendimit për pezullim të certifikatës së biznesit.
Sipas njoftimit të MINT, këtë vendim e ka marrë komisioni për shqyrtimin e ankesave për regjistrimin e bizneseve.
Në njoftim thuhet më tej se pala ankuese gëzon të drejtën për të parashtruar padi në gjykatën kompetente.
“Vendimi i Komisionit konstaton se ARBK-ja, në shkallën e parë, ka vendosur në përputhje me ligjin kur e pezulloi certifikatën e biznesit të Klan Kosovës sh.p.k.. Arsyetimi i ARBK-së për pezullimin e certifikatës ka qenë se, në dokumentet e regjistrimit të kompanisë pronare të biznesit në fjalë, “KGO Media Invest DOOEL”, komunat e Republikës së Kosovës paraqiten si qytete të Serbisë, gjë që përbën shkelje të Kushtetutës sonë” – thuhet në njoftimin e MINT
Ministria thotë se “Klan Kosova” Sh.P.K. pas kaq shumë vitesh ka nisur hapa për korrigjim, vërteton se biznesi në fjalë e kishte kryer shkeljen e konstatuar nga ARBK-ja dhe se vendimi për pezullimin e certifikatës së biznesit ishte marrë me të drejtë.
Ndryshe, MINT ka dorëzuar kallëzim penal kundër “Klan Kosova” Sh.P.K. dhe pronarëve të saj.
Vendimin e Ministrisë e ka kritikuar Asociacioni i Gazetarëve të Kosovës (AGK).
“AGK-ja, beson se ky proces që nga fillimi ka qenë i motivuar politikisht nga partia në pushtet dhe Qeveria e Kryeministrit Kurti, në përpjekje për të mbyllur televizionin më të madh privat në vend – thuhet, ndër të tjera, në reagimin e AGK-së.
Në anën tjetër Asociacioni i Gazetarëve të Kosovës (AGK), ka organizuar protestë sot me 31 korrik, në shenjë revolte për pezullimin e certifikatës së biznesit të Klan Kosova nga Ministria e Industrisë, Ndërmarrësisë dhe Tregtisë.
