Lajm në zhvillim - Mbledhja e nënshkrimeve për shkarkimin e kryetarëve të Zubin Potokut dhe Zveçanit - Pamje

13:03 – Pak qytetarë në Zubin Potok 

Pak qytetarë të interesuar gjatë mesditës në Zubin Potok, për të nënshkruar peticionin për shkarkimin e kryetarit të komunës, Izmir Zeqiri.

Ekipi i KALLXO.com po qëndron në këtë komunë:

12:44 – Telat me gjemba e makineritë e rënda qëndrojnë ende para objektit komunal në Zveçan

Pak metra nga objekti i Komunës së Zveçanit para të cilit u zhvilluan tensionet e majit 2023, serbët lokalë po nënshkruajnë peticionin për shkarkimin e kryetarit, Ilir Peci.

Telat me gjemba e makineritë e rënda qëndrojnë ende para objektit komunal.

10:50 – Peticioni, KFOR-i në Zveçan monitoron situatën

Pjesëtarë të KFOR-it janë duke qëndruar në afërsi të lokacionit ku është duke u nënshkruar peticioni për shkarkimin e kryetarit të Komunës së Zveçanit, Ilir Peci.

Qytetarët e Zubin Potokut dhe të Zveçanit sot kanë filluar mbledhjen e nënshkrimeve në peticionin për shkarkimin e kryetarëve të këtyre dy komunave.

Këtë e kanë konfirmuar për KALLXO.com dy kryetarët.

10:44 –  Peticioni në Zveçan 

KALLXO.com po qëndron në Zveçan dhe sjell pamje nga vendi i ngjarjes. Në fletët e peticionet janë simbolet e shtetit të Kosovës.

10:06 –  Flasin kryetarët aktualë

Ilir Peci, kryetar i Zveçanit ka njoftuar se organizimi për nënshkrim të peticioneve është duke u mbajtur në një tendë, afër komunës.

“Po, sot ka filluar. Është duke u mbajtë tek një tende këtu afër komunës. Nuk kemi ndonjë informatë më shumë për momentin” – tha Peci.

Sipas të dhënave të Komisionit Qendror të Zgjedhjeve, qytetarët e Zveçanit duhet të mbledhin hiç më pak se 1mijë e 411 nënshkrime.

KALLXO.com ka kontaktuar edhe me kryetarin e Zubin Potokut, Izmir Zeqiri. Ai njoftoi se edhe në këtë komunë ka filluar procesi i njëjtë.

Zeqiri tregoi se nga komuna nuk është lejuar të shfrytëzohet salla e sportit për mbajtjen e këtij procesi.

“Po, është para sallës së sportit në një hapësirë. Ka fillu me u mbajtë, gjendja është mirë në rregull. Jashtë sallës, nuk e kemi leju me shfrytëzu sallën, ka hapësirë të mjaftueshme jashta sallës” – tha Zeqiri.

Për të shkarkuar Zeqirin, KQZ ka njoftuar se duhen 1 mijë e 346 nënshkrime.

Edhe në Mitrovicë të Veriut e Leposaviq janë duke u mbledhur nënshkrimet për shkarkimin e kryetarëve të komunave.

KALLXO.com raportoi ekzkluzivisht nga këto dy komuna të mërkurën.

Kjo procedurë në këto dy komuna filloi më 17 janar 2024.

Mitrovica e Veriut, Zveçani, Zubin Potoku dhe Leposaviqi shkuan në zgjedhje më 23 prill 2023, pas dorëheqjeve të kryetarëve serbë që kundërshtonin vendimet Qeverisë së Kosovës.

Zgjedhjet në katër komunat në veri të Kosovës u bojkotuan nga serbët lokalë – nxitur nga Lista Serbe.

Zgjedhja në krye të komunave e kandidatëve shqiptarë pasoi me tensione në veri.