Paraqitje në Stacion Policor për Dy Deputetet
Donika Kadaj-Bujupi e Aida Dërguti gjatë muajit të ardhshëm do ta kenë të obliguar paraqitjen çdo të hënë në stacionin e policisë afër vendbanimeve të tyre.
Këtë masë sigurie e caktoi sot për të arrestuarat e djeshme, Gjykata Themelore në Prishtinë.
Prokuroria kishte kërkuar arrest shtëpiak për to.
16:00
Përfundoi seanca ndaj dy deputeteve të VV-së, ndërsa gjykata do të vendosë më vonë për masën e sigurisë ndaj tyre.
Prokuroria ka kërkuar arrest shtëpiak për Donika Kadaj-Bujupin e Aida Dërgutin, dy deputetet e “Vetëvendosjes” që u arrestuan dje.
Në seancën e caktimit të masës së sigurisë në Gjykatën Themelore në Prishtinë, prokuroria i mbeti besnike kërkesës së saj.
Sipas gazetarit të KALLXO.com, deputetet Kadaj-Bujupi e Dërguti u mbrojtën në heshtje.
Avokatët e tyre të caktuar sipas detyrës zyrtare-Shpend Bokshi për mbrojtjen e Aida Dërgutit dhe Shemsie Sheholli për Donika Kadaj-Bujupin, kundërshtuan kërkesën e prokurorisë për arrest shtëpiak.
Gjyqtari, para se të përfundojë seanca, tregoi se për caktimin e masës së sigurisë, ose lirimin e deputeteve do të vendosë më vonë gjatë ditës.
15:35
Në Gjykatën Themelore në Prishtinë është duke u zhvilluar seanca e caktimit të masës së sigurisë ndaj dy deputeteve të VV-së.
Donika Kadaj-Bujupi e Aida Dërguti janë dërguar në gjykatë për seancën e caktimit të masës së sigurisë.
Prokuroria Themelore në Prishtinë ka kërkuar arrest shtëpiak për dy deputetet e arrestuara dje nën dyshimet për armëmbajtje pa leje.
Sipas prokurorisë Donika Kadaj-Bujupit dje i është gjetur sprej, ndërsa Aida Dërgutit gaz lotsjellës.
Gjykata ka ndaluar filmimin dhe fotografimin e deputeteve, ndërsa seanca për caktimin e masës së sigurisë është duke u zhvilluar.
Donika Kadaj-Bujupi u arrestua dje derisa po priste të hynte në seancën e kuvendit, ku njëra nga pikat e rendit të ditës ishte ratifikimi i marrëveshjes së demarkacionit me Malin e Zi.
Edhe Daut Hoxha, zëdhënësi i Policisë së Kosovës tha dje për KALLXO.com se Donika Kadaj-Bujupit iu gjet gjatë kontrollit në hyrje një mjet i dyshimtë që dyshohet të jetë njëlloj spreji.
Edhe nënkryetarja e Kuvendit Aida Dërguti u arrestua po dje.
http://kallxo.com/arrestohen-dy-deputete-te-vv-se/
