Ministrja e Drejtësisë aktakuzën ndaj saj e quan politike

Ministrja Albulena haxhiu, Pal Lekaj, Donika Kada – Bujupi dhe Besa Baftiu janë ulur sot në bankën e të akuzuarve në Gjykatën e Prishtinës.

Ndaj tyre sot është mbajtur rigjykimi për gazin lotsjellës në kuvendin e Kosovës, aksion ky i cili në atë kohë ishte bërë nga opozita për ta kundërshtuar demarkacionin mes Kosovës dhe Malit të zi.

Të pafajshëm lidhur më veprat që ju vihen në barrë u deklarua Donika Kadaj – Bujupi, Pal Lekaj, Besa Baftiu dhe Albulena Haxhiu.

Kada-Bujupi tha që nuk ka asgjë për të shtuar krahas asaj që kishte thënë më parë.

“S`kam çka me shtu prej asaj që jam deklaruar vazhdimisht, e pa fajshme”- tha Kada- Bujupi

Tutje ajo tha që ndihen të dëmtuar nga ky proces i gjatë pasi që i është mohuar e drejta për kandidim.

“Unë nuk pash që prokurori prezantoi ndonjë provë në rastin tim meqë bëhet fjalë për shtatë vite, mua më është mohuar e drejta për kandidim….”- tha Kada-Bujupi

Kurse ministria e Drejtësisë tha që prezantimi i prokurorisë ishte më shumë si një shou dhe aktakuzën e prokurorisë e konsideroi si të pabazë, të padrejtë dhe politike.

“Në fakt prita që prokurori do të propozoj gjithçka veç e veç për secilin që ne jemi këtu, por nuk e bëri. Bëri më tepër një shou, se sa një prezantim të aktakuzës së tij, përveç se konsideroj se aktakuza është e pabazë e padrejtë dhe politike, kam prit që prokurori me u tërheq nga aktakuza por pse s`po e bën nuk e kam të qartë….”, tha ministrja Haxhiu.

Pas deklarimit të të pandehurve lidhur me fajësinë e tyre, në fazën e administrimit të provave prokuroria propozoi që në cilësinë e dëshmitarit të dëgjohej hetuesi i çështjes, Destan Rukolli dhe të administrohet si provë materiale vërtetimi mbi marrjen e përkohshme te sendeve.

Pas këshillimit dhe votimit gjykata i aprovoi propozimet e prokurorit të çështjes.

Seanca e radhës për këtë rast do të mbahet më datën 10 shkurt të këtij viti.

Ministrja e Drejtësisë, Albulena Haxhiu bashkë me tre ish-deputetë janë liruar nga akuza në lidhje me mbajtjen e kundërligjshme të gazit lotsjellës.

“Në emër të popullit mori vendim  se të pandehurit, konform ligjit lirohen nga akauzat”- kishte thënë gjyqtarja Fatime Dërmaku.

Arsyetimi i gjykatës për vendosjen ndaj këtij rasti ishte se provat  e paraqitura nga Prokuroria nuk provojnë  kryerjen e veprës penale,

Pas këtij vendimi nga gjykata Themelore, prokuroria kishte paraqitur ankesë në gjykatën e apelit dhe rasti është kthyer në rigjykim.

Albulena Haxhiu, Besa Baftiu, Donika Kadaj- Bujupi e Pal Lekaj, akuzoheshin se në shkurt të 2016-tës, kanë futur bombola të gazit lotsjellës në Kuvendin e Kosovës duke e kryer veprën penale armëmbajtje pa leje.

Aktakuza ka të bëjë me kohën kur partitë atëherë në opozitë, Lëvizja Vetëvendosje, Aleanca për Ardhmërinë e Kosovës dhe Nisma Socialdemokrate kundërshtonin marrëveshjen Kosovë – Mali i Zi për demarkacionin e kufirit dhe marrëveshjen Kosovë – Serbi për themelimin e Asociacionit të Komunave me Shumicë Serbe.

Ministrja Haxhiu dhe të tjerët përsëri në gjykim për gazin lotsjellës