Ish-asamblisti i PDK-së në Gjakovë pranon fajin për mosdeklarim të pasurisë

Në procesin gjyqësor ndaj Ilir Beqirit, i cili po ngarkohet me akuzën e mos raportimit ose raportimit të rrejshëm të pasurisë në kohën kur kishte qenë asambleist i PDK-së, sot ishte planifikuar të mbahej shqyrtimi gjyqësor.

Mirëpo në seancën e sotme, pas leximit të aktakuzës nga prokurori Anton Hasanaj, para gjyqtarit Drilon Haraçia, i akuzuari Ilir Beqiri e pranoi fajësinë.

Ai tha se në këtë rast është bërë një lëshim nga pakujdesia dhe neglizhenca.

“Kam menduar se te deklarimi i pasurisë duhet të paraqiten vetëm të hyrat publike dhe jo ato private, e gjithashtu nuk kam pasur ndonjë qëllim tjetër”, deklaroi ish-asamblisti Ilir Beqiri.

Verdikti përfundimtar në këtë rast do të jepet nesër.

Në këtë rast kanë kaluar 16 muaj nga mbajtja e seancës së fundit, e cila ishte mbajtur me datë 2 prill 2019.

Kjo gjë kishte ndodhur për shkak se fillimisht këtë rast e ka gjykuar gjykatësi Mentor Bajraktari, i cili nga Departamenti i Përgjithshëm ka kaluar në Departamentin e Krimeve të Rënda, pastaj kishte filluar pandemia Covid-19 ku ishte ndërprerë mbajtja e seancave gjyqësore, ndërsa tashmë rasti ka kaluar te gjykatësi Drilon Haraçija.

https://kallxo.com/ligji/pas-me-shume-se-1-viti-caktohet-seanca-per-gjykimin-ndaj-ish-asamblistit-te-pdk-se/

Ish-asamblisti i PDK-së në Gjakovë, Ilir Beqiri, i cili po akuzohet për mos-raportim ose raportim të rremë të pasurisë, fillimisht ishte deklaruar i pafajshëm.

Sipas aktakuzës së ngritur nga prokurori Ramiz Buzhala, Ilir Beqiri po akuzohet se nuk ka bërë deklarim të pasurisë apo të ardhurave, e këtë duke e ditur që si këshilltar në Asamblenë Komunale në Gjakovë, duhej ta bënte.

Duke mos respektuar ligjin ai nuk i kishte dërguar të dhënat në afatin ligjor në Agjencinë kundër Korrupsionit në Prishtinë.

Në aktakuzë thuhet se të dhënat e kërkuara për periudhën 1 janar deri më 31 dhjetor të vitit 2016, nuk i kishte shënuar saktë.