Gjakovë - Ish asamblisti i PDK-së sfidon akuzën për deklarim të rremë të pasurisë

Ilir Beqiri, i cili akuzohet për raportim të rrejshëm të pasurisë në kohën kur ishte asamblist i PDK-së, i ka kundërshtuar pretendimet e Prokurorisë së Gjakovës.

Në seancën e së martës para gjykatësit Mentor Bajraktari, ai i kundërshtoi aktakuzën e Prokurorisë.

Ilir Beqiri tha se akuza që i vihet në barrë nga ana e Prokurorisë, është e pabazuar dhe nuk ka fakte.

Në anën tjetër, prokuroja Dëshire Jusaj, tha se aktakuza e Prokurorisë ka fakte dhe prova të mjaftueshme që e ngarkojnë të akuzuarin Ilir Beqiri.

Ish-asamblisti i PDK-së në Gjakovë, Ilir Beqiri, i cili po akuzohet për mos-raportim ose raportim të rremë të pasurisë, ishte deklaruar i pafajshëm.

Sipas aktakuzës, Ilir Beqiri po akuzohet se nuk ka bërë deklarim të pasurisë apo të ardhurave, e këtë duke e ditur që si këshilltar në Asamblenë Komunale në Gjakovë, duhej ta bënte.

Aktakuza e ngarkon atë se duke mos respektuar ligjin nuk i kishte dërguar të dhënat në afatin ligjor në Agjencinë Kundër Korrupsion në Prishtinë.

Në aktakuzë thuhet se të dhënat e kërkuara për periudhën 1 janar deri më 31 dhjetor të vitit 2016, nuk i kishte shënuar të dhënat e sakta.