Flamuri i Ukrainës - Foto: Faqja zyrtare e Presidencës ukrainase
Lufta në Ukrainë: Jetët e fëmijëve të humbur në luftë
Numri i civilëve të vrarë gjatë pushtimit rus të Ukrainës po rritet çdo ditë.
Deri të dielën, komisioneri i Ukrainës për të drejtat e njeriut tha se numri i viktimave civile ishte 210, duke përfshirë disa fëmijë.
Mes të vdekurve është një vajzë e quajtur Polina, e cila ishte në vitin e fundit të shkollës fillore në kryeqytetin Kiev.
Sipas autoriteteve lokale të Kievit, ajo dhe prindërit e saj u qëlluan për vdekje nga një grup sabotazhi dhe zbulimi rus në një rrugë në veriperëndim të kryeqytetit.
Vëllai dhe motra e Polinës u dërguan në spital. Motra e saj është në kujdes intensiv dhe vëllai i saj u dërgua në një spital të veçantë për fëmijë.
Disa civilë të tjerë kanë vdekur.
Një vajzë shtatë vjeçare vdiq në një sulm në një kopsht fëmijësh dhe 10 anëtarë të komunitetit etnik grek të Ukrainës u vranë kur fshatrat e tyre u vunë nën zjarr në jug të Ukrainës.
Sot, është dita e pestë e pushtimit rus të Ukrainës – lufta e parë e madhe tokësore në Evropë në dekada.
Presidenti rus, Vladimir Putin, tha se ka nisur, sipas tij, një operacion “special” për “çmilitarizimin dhe denacifikimin” e Ukrainës.
Shtetet e Bashkuara, Bashkimi Evropian, Britania e Madhe dhe NATO-ja e dënuan sulmin dhe u zotuan se do ta mbajnë Rusinë përgjegjëse për këtë luftë./BBC