Çfarë ndodh kur telefoni i juaj përfundon në ujë?

Edhe pse shumica e telefonave të mençur mburren se janë të papërshkueshëm nga uji dhe mund të “zhyten” disa metra, në realitet është më mirë të mos e provoni këtë.

Po, shumica e telefonave nuk do të dëmtohen nëse derdhni ujë (ose një lloj lëngu) mbi ta ose ju zë ndonjë shi të verës. Por nëse telefoni bie në ujë dhe kalon pak kohë atje, mund të keni probleme.

Përkatësisht, shumica e telefonave inteligjentë kanë një pjesë brenda që e pengon hyrjen e ujit në pjesët kryesore, si pllakë amë, procesor dhe të ngjashme. Por altoparlantët dhe porta e karikimit janë të ekspozuara.

Gjëja e parë që duhet të bëni nëse telefoni juaj bie në ujë është ta nxirrni dhe ta thani sa më mirë. Nuk është e pavend ta fikni për ta shmangur një qark të shkurtër për shkak të hyrjes së ujit. Për tharje, përdorni një peshqir, pëlhurë letre ose ndonjë pëlhurë tjetër absorbuese dhe mos e thani asnjëherë me tharëse flokësh ose ndonjë burim tjetër nxehtësie.

Pasi ta keni tharë nga jashtë, lëreni mënjanë që të thahet mirë. Asnjëherë mos e lini në rrezet e diellit direkte për të shmangur mbinxehjen. Kur telefoni juaj duket se është tharë, ndizeni dhe kontrolloni nëse gjithçka po funksionon siç duhet.

Uji shpesh mbetet në altoparlant, gjë që mund të ndikojë në cilësinë e zërit gjatë telefonatave, por edhe gjatë shikimit të përmbajtjes multimediale. Për ta nxjerrë atë ujë, përdorni një truk të thjeshtë.

Nëse jeni duke përdorur një iPhone, shtoni shkurtesën Water Eject në ekranin tuaj bazë për ta detyruar telefonin të nxjerrë ujin nga altoparlanti. Kur shtoni një shkurtesë në ekranin tuaj bazë, mund të aktivizoni shpërndarësin e ujit duke prekur shkurtesën ose t’i kërkoni Siri-t ta ndezë atë.

Do të hapet një meny në të cilën duhet të zgjidhni Start dhe më pas nivelin e intensitetit – nga 1 në 3. SHËNIM: Para se të filloni këtë opsion, hiqni kufjet (nëse i mbani), përndryshe i gjithë procesi nuk do të ketë kuptim.

Prisni që procesi të përfundojë. Gjatë nxjerrjes së vetë ujit, do të mund të ndjeni dridhjet që vijnë nga thellësia e telefonit. Përveç kësaj, nëse keni më shumë ujë në altoparlant, do të mund të vëreni pika të vogla që dalin nga telefoni.

Pas kësaj, kontrolloni nëse situata me altoparlantin është më e mirë. Nëse jo, përsërisni procesin dhe, për efekt më të mirë, kthejeni telefonin në drejtime të ndryshme ndërsa ai vibron për t’u siguruar që uji të ketë dalë.

Pronarët e Android që gjenden në një situatë të tillë mund të përpiqen të nxjerrin ujin mekanikisht (të tundin lehtë pajisjen) ose të instalojnë aplikacionin Clear Wave – Water Eject dhe të ndjekin udhëzimet në ekran. Aplikacioni, pasi të fillojë, do të lëshojë tinguj të ndryshëm të lartë dhe të ulët përmes altoparlantit për ta nxjerrë ujin e tepërt dhe në fund do të kryejë një test zëri për t’u siguruar që nuk ka më ujë në sistem.

Nëse edhe pas kësaj procedure situata e zërit nuk është më e mirë, ju sugjerojmë ta vizitoni qendrën e servisit të telefonave./Dnevnik.hr