Rrënohet Shtëpia e Shekullit XIX, Monument i Mbrojtur me Ligj

Në Prizren është rrënuar shtëpia e familjes Hisari, e cila ishte e mbrojtur me Ligjin për Qendrën Historike të Prizrenit.

Organizata “Ec ma Ndryshe”, ka reaguar ndaj këtij rrënimi, duke thënë se kjo shtëpi është e listuar në shtojcën II të këtij Ligji përkatësisht Monumentet Kulturore në Qendrën Historike të Prizrenit.

“Aty shkruan se shtëpia e Hilmi Hisarit i takonte shekullit XIX”, thuhet në reagim.

Më pas, kjo organizatë thotë se sipas informatave fillestare të marra nga autoritetet lokale të trashëgimisë kulturore shtëpia ka qenë në gjendje jo të mirë për banim.

“Kësisoj institucionet është dashur që me kohë të angazhohen në dy drejtime: për sigurimin e jetës së banorëve dhe po ashtu për mbrojtjen e monumentit. Kjo shtëpi sipas hulumtuesve kishte vlera historike, shkencore, artistike, identiteti, ekonomike dhe funksionale”.