Polici i vrarë ishte ushtar i UÇK-së në Koshare

Polici Izet Demaj, i cili u vra sot në qytetin e Istogut derisa ndihmonte qytetarët e marrë peng në një bankë, ka qenë ushtar i UÇK-së në betejën e Koshares.

Këtë e ka bërë të ditur bashkëshortja e heroit Agim Ramadani, Shukrije Ramadani, e cila është shprehur e tronditur nga vrasja e policit Demaj.

“Lajmi për vrasjen e oficerit të policisë Izet Demaj, ushtarit të Koshares, hijes mbrojtëse të komandant Rrustem Berisha, na tronditi thellë. Ngushëllime të përzemërta familjes Demaj, shokëve, miqve dhe të gjithë pjesëtarëve të policisë”, ka shkruar ajo në Facebook.

Polici Izet Demaj u vra sot pasdite në një përleshje me një person të armatosur, i cili kishte hyrë për të grabitur një bankë në Istog.

Demaj u vra gjatë përpjekjes për t’i liruar disa persona të cilët ishin marrë peng nga grabitësi.

Më pas, grabitësi u qëllua për vdekje nga kolegët e Izet Demajt.

Sipas Spitalit të Pejës, polici Izet Demaj ishte sjellë pa shenja jete.

https://kallxo.com/polici-kishte-vdekur-para-se-te-arrinte-ne-spital/

KALLXO.com publikoi pamje nga momenti kur u qëllua grabitësi i dyshuar.

https://kallxo.com/video-18-momenti-i-vrasjes-ne-istog/