Planifikoheshin Liqene në Tokën që Tash i Takon Malit të Zi
Gjonbalaj humbjen e territorit e lidh me një projekt të ish-Krahinës së Kosovës për liqene akumuluese në pjesën që me marrëveshjen e nënshkruar në Vjenë vitin e kaluar i takon Malit të Zi.
“Në vitin 1963 ‘Energoprojekti’ i Beogradit, një kompani me renome për lami të ujërave, ka bërë një projekt për shfrytëzimin energjetik të ujërave të Bistricës të Pejës. Në atë studim janë parapa të ngrihen 3 akumulime, e njëra prej atyre akumulimeve është në lumin Bjelluhës”, thotë ai.
Sipas ekspertit Gjonbalaj, Kosova ka pasur mundësi të planifikojë projekte të tilla veç në territorin e vet.
“Kosova ka mundur të planifikojë veç në territor të vetin, e jo në territore të tjetërkujt,” tha Gjonbalaj.
Edhe Azem Vllasi, njohësi i politikës së ish-Jugosllavisë tha se republikat dhe krahinat e këtij shteti kanë mundur të porosisin projekte vetëm për territorin e vet.
“Kjo ka të bëjë me rrjedhat e ujit në drejtim të Kosovës, i porositur projekti prej institucioneve të Kosovës, domethënë në territorin e Kosovës. Nuk ka mundur Kosova e as një institucion i Kosovës me porosit kësi projekte për në territor të Malit të Zi, e as anasjelltas që Mali i Zi të bëjë projekte të tilla në Kosovë,” tha në mes tjerash Vllasi.
KALLXO.com ka provuar që të kontaktojë edhe me kryetarin e Komisionit Qeveritar për Shënimin e Vijës Kufitare me Malin e Zi, Murat Mehën, në lidhje me pretendimet e ekspertit Gjonbalaj, por Meha ka thënë se komisioni e ka kryer punën e tij dhe tash u takon institucioneve tjera të vendosin për demarkacionin.
Edhe pse kanë kaluar më shumë se 10 muaj nga nënshkrimi i marrëveshjes që përcakton vijën kufitare me Malin e Zi, ajo ka mbetur pezull dhe ende nuk i ka shkuar për ratifikim Kuvendit, edhe pse është kusht për lëvizjen pa viza në Zonën Schengen të kosovarëve.
Opozita por edhe disa ekspertë tjerë po e kundërshtojnë këtë marrëveshje, ngase sipas tyre Kosova humb tokë nga ajo.
Dje disa deputetë opozitarë vizituan zonën kufitare me Malin e Zi të ftuar nga banorët e Rugovës.
http://kallxo.com/deputetet-opozitare-ruajne-kufirin/
