NISMA kërkon nga Manastiri i Deçanit të mos pengojë asfaltimin e rrugës për Plavë

Dega e Nismës Socialdemokrate në Deçan ka kërkuar nga Manastiri i Deçanit të mos pengojë asfaltimin e rrugës Deçan-Plavë, e cila kalon në zonën e veçantë të këtij Manastiri.

Sipas reagimit të kësaj partie, Këshilli Menaxhues i Zonës së Veçantë të Manastirit të Deçanit, kohë më parë nuk ka penguar ndërtimin e hidrocentraleve në këtë zonë, ndaj nuk duhet të pengojë as asfaltimin e rrugës.

“Nisma Socialdemokrate dega në Deçan, shprehet e shqetësuar me lëvizjet e fundit rreth asfaltimit të rrugës Deçan-Plavë, dhe tentimin e pengimit nga ana e Manastirit të Deçanit. Nisma Socialdemokrate dega në Deçan, i kërkon Këshillit Menaxhuese të Zonës së Veçantë të Manastirit të Deçanit, që nesër në mbledhjen e tyre, të marrin vendim të drejtë dhe të mos pengojnë ndërtim e kësaj rrugë, kur dihet së ky këshill nuk ka penguar kohë me parë ndërtimin e Hidrocentraleve në kuadër të Zonës së Veçantë të Manastirit të Deçanit”, thuhet në reagimin e tyre.

Kjo parti ka kërkuar edhe nga kryetari i Komunës së Deçanit të mos pranojnë asnjë kompromis rreth asfaltimit të kësaj rruge dhe të mos bëj ndonjë devijim të trasesë së rrugës.