LVV: Protesta do të jetë madhështore

Në prag të nisjes së protestës të organizuar nga Lëvizja Vetëvendosje, kjo parti tha se qytetarë të shumtë i janë bashkuar konvojeve të autobusëve për në kryeqytet.

“Nisje masive nga qytetet e Kosovës. Protesta do të jetë madhështore”, thuhet në postimin e LVV-së në Facebook.

Gazetarët e KALLXO.com nga qytetet e ndryshme të Kosovës raportojnë se protestuesit kanë nisur të grumbullohen në pikat e nisjes sipas orarit të organizuar nga Lëvizja Vetëvendosje.

Protesta e 29 shtatorit është thirrur nën organizimin e Lëvizjes Vetëvendosje.

Qëllimi i protestës sipas organizatorëve është shfaqja e kundërshtimit ndaj idesë së presidentit të Kosovës, Hashim Thaçi për korrigjimin e kufijve me Serbinë.

Për ditë me radhë, LVV ka publikuar video promocionale dhe ka bërë tubime ku ftoi qytetarët dhe aktivistët në protestë kundër idesë së presidentit Hashim Thaçi për korrigjim të kufijve që sipas tyre nënkupton edhe shkëmbim territoresh.

Autobusë falas për aktivistë dhe qytetarët që dëshirojnë t’i bashkohen protestës janë organizuar nga LVV me nisje nga secila komunë e Kosovës.

“Të shtunën, me 29 shtator, prej orës 14:00, së bashku do të protestojmë paqësisht e qytetarisht në Prishtinë kundër pazareve me Serbinë, për sovranitetin e vendit”, thuhej në njoftimin e Lëvizjes Vetëvendosje.