Kadri Veseli Zgjidhet Kryetar i PDK-së
Kryetari i PDK-së Kadri Veseli propozoi shtyrjen e ndryshimeve të Statutit të PDK-së në konventën e punës.
Me shumicë votash u vendos që ndryshimet të diskutohen në këtë konventë që do të zhvillohet këtë vit.
Pastaj u diskutua në lidhje me deklaratën politike të PDK-së që do të dalë nga konferenca e sotme.
U vendos që pikat 2, 3 dhe 4 ku flitet për barabarësinë në PDK dhe për një tranzicion të qetë nga njëri kryetar të tjetri, të hiqen.
Deklaratës iu shtua pika për formimin e Forcave të Armatosura dhe një tjetër ku falënderohet ish-kryetari Thaçi.
Deklarata pastaj u votua pa asnjë votë kundër.
14:15
Kadri Veseli u zgjodh kryetar i PDK-së pa asnjë votë kundër.
Pas zgjedhjes së kryetarit, PDK-ja shtyu ndryshimet statusore që kishte planifikuar t’i diskutonte sot.
Votimi për zgjedhjen e tij u bë me vota të hapura, ndërsa ai ishte kandidati i vetëm.
Hajredin Kuçi e ftoi atë ta marrë fjalën pas zgjedhjes.
13:45
Në Konventën VII të PDK-së Hajredin Kuçi shpalli kandidaturën e Kadri Veselit për kryetar të kësaj partie.
Ai ish-kryetarin dhe kandidatin e tashëm për kryetar i cilësoi binom politik.
“Ata e kanë plotësuar njëri-tjetrin dhe kanë qenë binom. Më lejoni ta shpall kandidaturën e z. Veseli,” tha Kuçi.
Basri Musmurati pastaj propozoi që për kryetarin të votohet me vota të hapura.
Aktualisht në konventë po flet Kadri Veseli.
Veseli tha se të gjithë “në këtë konventë e kemi një hall-si ta bëjmë PDK-në më të mirë e më të suksesshme”.
Ai lavdëroi transparencën e PDK-së.
“Cila parti politike në këtë vend a Ballkan ia lejon njëri-tjetrit me ia thënë [të gjitha] në sy,” tha Veseli.
Ai duke qenë kandidat i vetëm për kryetar i kërkoi kryesisë së punës që t’u japë m undësinë edhe njëherë edhe të tjerëve për kandidim.
11:15
Miratohet rregullorja e punës dhe rendi i ditës i Konventës VII.
Nga 806 delegatët e PDK-së të pranishëm sipas komisionit verifikues janë 714.
Në kryesinë e punë së Konventës VII të PDK-së u zgjodhën Arsim Bajrami, Justina Pulaj, Enver Hoxhaj, Hajredin Kuçi, Avdyl Ymeri, Ismajl Syla e Laura Guguli.
11:40
Konventa VII e PDK-së nisi me himnin e Kosovës dhe atë kombëtar.
Hajredin Kuçi iu drejtua pastaj delegatëve në këtë Kuvend.
Kuçi tha se “ADN-ja e PDK-së mbetet UÇK-ja”, ndërsa shpalli të hapur Konventën VII të kësaj partie.
Delegatët e PDK-së kanë filluar të hyjnë në sallën ku do të zhvillohet konventa.
Të ftuar për ta monitoruar zgjedhjen e kryetarit të PDK-së janë disa orgamnizata joqeveritare dhe përfaqësues të Komisionit Qendror të Zgjedhjeve.
Zgjedhja e kryetarit të PDK-së ndodh pasi Hashim Thaçi dha dorëheqje nga drejtimi i kësaj partie për shkak të zgjedhjes President më 7 prill.
Kandidat për kryetar të PDK-së deri tash është vetëm ushtruesi i detyrës së këtij posti Kadri Veseli.
Nëkryetari PDK-së Enver Hoxhaj në një konferencë për gazetarë dje nuk e përjashtoi mundësinë që deri në mbajtjen e konventës të paraqitet edhe ndonjë kandidat tjetër.
Ai tregoi se si planifikohet të zhvillohet Konventa e Shtatë e jashtëzakonshme e PDK-së.
“Ditën e parë do të kemi zgjedhjen e kryetarit të partisë, plotësime dhe ndryshime të statutit të partisë dhe miratimin e një deklarate politike, ku ne e përmbyllim pjesën zgjedhore të konventës. Ndërsa ditën e dytë, i zgjedhuri mban fjalim për platformën e tij,” shpjegoi Hoxha.
Ai nuk diti saktësisht të tregojë se si do të votohet në konventë.
“E kemi diskutuar. Ka mendime që votimi do të jetë i fshehtë, ka mendime që të shkojmë me aklamacion. Por, i takon konventës të vendosë,” shpjegoi Hoxhaj.
PDK-ja ka 806 delegatë nga të cilët do të zgjidhet kryetari.
Konventa VI e PDK-së u mbajt në janar të vitit 2013. Atëherë u zgjodh Hashim Thaçi kryetar, ndërsa kundër tij votoi vetëm njëri nga delegatët e PDK-së.
Edhe Thaçi atëherë nuk pati kundërkandidat.
