Kryeministri Ramush Haradinaj - Foto: KALLXO.com
Haradinaj- Veteranëve: Kujtojmë Lavdinë, Ndërtojmë Paqen
Në Ditën e Veteranëve, Kryeministri Ramush Haradinaj u është drejtuar me fjalë për të kaluarën dhe të tashmen ish-bashkëluftëtarëve.
“Kaluam së bashku ditë të paharruara, me vështirësi e flijime, të pikëlluar kur humbnim shokët, të lumtur kur korrnim fitore. Ato janë ditët e lavdisë, që i kujtojmë gjithmonë, e në atë frymë, po ndërtojmë edhe paqen”, tha Haradinaj në deklaratën për këtë ditë.
Haradinaj tha më tutje se sot “përkujtojmë luftëtarët shqiptarë të të gjitha kohërave. Kujtojmë shokët e rënë, lavdinë dhe fitoren e Ushtrisë Çlirimtare të Kosovës”.
Ai kërkoi bashkim për fuqizim të shtetit.
“Tani, kur jemi në 20 vjetorin e rezistencës dhe dhjetëvjetorin e pavarësisë, duhet të jemi më të bashkuar se kurrë si popull që të kontribuojmë në qytetarinë aktive për ndërtimin dhe fuqizimin e shtetit tonë”, tha Haradinaj.