Çmimet njësoj si para një muaji, por jo si para një viti

Çmimet në muajin prill nuk pësuan ndryshime në raport me një muaj më parë, përderisa në krahasim muajin e njëjtë të vitit të kaluar, ato u rritën për 0.4 për qind.

Indeksi i Harmonizuar i Çmimeve të Konsumit (IHÇK) tregon se çmimet në prillin e sivjetmë nuk ndryshuan në krahasim me muajin mars, sipas shënimeve të Agjencisë së Statistikave.

“Indeksi i tërësishëm i harmonizuar i çmimeve të konsumit në vend është i pandryshuar 0.0% në muajin prill 2018, krahasuar me muajin mars 2018”, tregon ASK-ja.

Megjithatë në prill pak më i shtrenjtë ishte çmimi i rrymës dhe i pemëve.

“Ngritje e lehtë e çmimeve vërehet te nëngrupet: pemë (1.1%); ujë mineral, pije joalkoolike, lëngje nga pemët dhe perimet (0.4%); energji elektrike (2.5%); përdorimi i pajisjeve për transportin personal (0.5%), me një ndikim të përbashkët të këtyre nëngrupeve prej 0.1%”, thuhet në indeksin e ASK-së

Sipas Agjencisë së Statistikave ngritja u neutralizua kryesisht nga rënia e lehtë e çmimeve te nëngrupet: perime -1.7 për qind; dru zjarri për ngrohje -5.3 për qind, me një ndikim të përbashkët të këtyre nëngrupeve prej 0.1 për qind në IHÇK.

Shkalla e inflacionit e matur në muajin prill 2018 në raport me muajin prill 2017 ishte 0.4 për qind.

Të dhënat e ASK-së tutje thonë se Indeksi i tërësishëm i harmonizuar i çmimeve të konsumit është më i lartë për 0.4 për qind në muajin prill 2018, krahasuar me muajin prill 2017.

Sipas ASK-së, kjo kryesisht është shpjeguar me ngritjen e çmimeve të konsumit te nëngrupet: bukë dhe drithëra 1.9 për qind; mish 0.5 për qind; qumësht, djathë dhe vezë 1.5 për qind; kafe dhe çaj 3.4 për qind; duhan 3.1 për qind; përdorim i pajisjeve për transportin personal 2.0 për qind; shërbimet për transport 6.5 për qind-(ngritje e çmimit të biletave me aeroplan), me një ndikim të përbashkët të këtyre nëngrupeve prej 0.9 për qind.

Ngritja e çmimeve u neutralizua me rënien e çmimeve të sheqerit dhe  ëmbëlsirave.

“Ngritja u neutralizua, kryesisht nga rënia e çmimeve të konsumit te nëngrupet: perime (-3.2%); sheqer dhe ëmbëlsira (-9.0%); rrymë, gaz dhe lëndë djegëse të tjera (-1.5%)-(rënie e çmimit të drunjve për ngrohje); pajisje shtëpiake (-3.5%); pajisje audio-vizuele, fotografike për përpunimin e informatave (-5.2%), me një ndikim të përbashkët të këtyre nëngrupeve prej (-0.5%)”, shpjegon Agjencia e Statistikave.

KALLXO.com shkroi për çmime të konsumit edhe në muajt tjerë.

http://kallxo.com/cmimet-vazhdojne-ti-kercenojne-shportat-e-konsumatorit/

http://kallxo.com/1-7-per-qind-inflacioni-ne-shtator/