Zëvendëskryeministri Tahiri nuk flet për masat e karantinës në veri të Kosovës
Zëvendëskryeministri i Kosovës nga radhët e Listës Serbe, njëherësh ministri i Pushtetit Lokal, Goran Rakiq përmes një konference për media sonte shpalli karantinën në komunat e veriut të Kosovës.
Por lidhur me këtë temë nuk ka pranuar të flasë zëvendëskryeministri i Kosovës, Besnik Tahiri, i cili tha shkurt për KALLXO.com se nuk flet për pandeminë.
“A ke ndonjë pyetje për ligjin e pagave, të përgjigjem 24 orë. Mua mos më thirr, ministrin e Shëndetësisë e thërret për pandemi, unë nuk flas. Flas për ndonjë pyetje për ligj të pagave”, tha Tahiri.
Fillimisht KALLXO.com kishte kontaktuar ministrin e Shëndetësisë Armend Zemaj për ta pyetur nëse qeveria ka vendosur ndonjë masë për COVID-19 në veri të vendit, por i njëjti nuk ka qenë i qasshëm.
KALLXO.com i ka dërguar edhe pyetje me shkrim Zemajt, por nuk ka pranuar përgjigje deri në publikimin e këtij artikulli.
Ndërkaq, në Klan Kosova Zemaj ka theksuar se është i njoftuar me vendimin e zëvendëskryeministrit Rakiq.
“Jam i njoftuar dhe jemi duke e menaxhuar atë situatë. Është komunikim që është duke u bërë tash në orët e vona. Edhe Ministria e Punëve të Brendshme, edhe kryeministri, edhe akterë të tjerë”, tha ministri.
Me vendimin e fundit të Qeverisë së Kosovës, në karantinë nga ora 21:00 deri në 05:00 janë Prishtina, Prizreni, Ferizaj dhe Vushtrria, por jo edhe komunat në veri të vendit.
.