Foto: ZPRK
Osmani takon kryeministrin e Libanit, Najib Mikati
Presidentja e Kosovës, Vjosa Osmani, e cila po qëndron në New York, ku po mbahet sesioni i 78-të i Asamblesë së Kombeve të Bashkuara, ka zhvilluar një takim me kryeministrin e Libanit, Najib Mikati.
Sipas komunikatës së Presidencës, në takim Osmani ka theksuar përkushtimin e Kosovës për formalizimin e marrëdhënieve diplomatike.
Presidentja Osmani, sipas komunikatës, e ka njoftuar kryeministrin Mikati edhe për zhvillimet e fundit në Kosovë.
“Të dy bashkëbiseduesit diskutuan për mundësitë e bashkëpunimit në fushat e interesit të përbashkët”- thuhet në komunikatë.
Në takim me kryeministrin Mikati, sipas komunikatës, presidentja Osmani ka folur edhe për organizimin e edicionit të dytë të Forumit global të Grave, Paqes dhe Sigurisë që mbahet më 23 tetor të këtij viti dhe i bëri ftesë për pjesëmarrje atij dhe zyrtarëve të tjerë libanezë.
Presidentja Osmani po ashtu ka takuar edhe presidentin e Kenisë, William Ruto.
Presidentja e Kosovës, Vjosa Osmani, dje ka udhëtuar për në New York.