Foto: ZPRK
Presidentja Osmani takoi presidentin e Kenisë, William Ruto
Presidentja e Republikës së Kosovës, Vjosa Osmani, e cila po qëndron në New York, ku po mbahet sesioni i 78-të i Asamblesë së Kombeve të Bashkuara, ka zhvilluar një takim me presidentin e Kenisë, William Ruto.
Sipas komunikatës së Presidencës, në këtë takim Osmani e ka falënderuar homologun Ruto pas vendimit të Kenisë për njohjen e pasaportave të Republikës së Kosovës dhe në të njëjtën kohë ka shtruar nevojën e thellimit të marrëdhënieve diplomatike në të mirë të qytetarëve dhe shteteve.
“Mezi presim ndërmarrjen e hapave të përbashkët që do t`i afrojnë tutje vendet dhe popujt tanë”- citohet të ketë thënë Osmani.
Tutje në këtë takim sipas komunikatës është diskutuar edhe për mundësinë e bashkëpunimit ekonomik ndërmjet Kosovës dhe Kenisë, si dhe nxitjen e shkëmbimeve tregtare dhe ekonomike.
“Presidentja Osmani në një pjesë të takimit foli edhe për përkushtimin e Kosovës për zhvillim të qëndrueshëm dhe mundësinë e nismave të përbashkëta në fusha të tilla si energjia e rinovueshme dhe ndryshimet klimatike”- thuhet në komunikatë.
Presidentja e Kosovës, Vjosa Osmani, dje ka udhëtuar për në New York.