KPM reagon për transmetimin e mesazheve mbështetëse për terroristët në kanalet sportive serbe që transmetohen në Kosovë
Komisioni i Pavarur i Mediave tashmë ka nisur mbledhjen e provave për mesazhet mbështetëse për ngjarjet e 24 shtatorit që u shfaqën mbrëmë në disa kanale serbe të ‘ArenaSport’ në Kosovë.
Kryetari i KPM-së, Jeton Mehmeti në Facebook ka konfirmuar se ka pranuar mesazhe në lidhje me mesazhet mbështetëse për terroristët e varë në sulmin terrorist në Banjskë të Zvecanit, të dielën e 24 shtatorit.
Këto mesazhe u transmetuan përmes platformave televizive si ‘Artmotion’, ‘Kujtesa’ dhe ‘Ipko’, pasditen e së shtunës.
“Do t’i kujtojmë” dhe “Lavdi heronjëve” janë mesazhet e shkruara në kanalet e ‘ArenaSport’, ndërsa ngjitur është edhe data 24 shtator 2023.
“Mbrëmë jemi lajmëruar nga qytetarë të shumtë se disa nga operatorët e shpërndarjes që janë të licencuar nga KPM po transmetojnë në platformat e tyre video mesazhe kërcënuese për rendin dhe sigurinë kombëtare. Sot kemi filluar menjëherë me mbledhjen e provave. Nesër i analizojmë gjetjet kurse të martën vendosim për rastin në mbledhjen e Komisionit”- ka shkruar Mehmeti në Facebook.
Por kjo nuk është hera e parë që këto kanale që në Kosovë transmetohen përmes tri platformave televizive, kanë shfaqur mbështetje publike për sulmin terrorist në Kosovë.
Më 27 shtator, kur Serbia shpalli zyrtarisht ditë zie për shtetin e tyre, në kanalet e ‘Arenasport’ përgjatë transmetimit të ndeshjeve, poshtë ekranit u shfaq edhe shkrimi ‘ditë zie’.
Më pas, në të njëjtën ditë, këto kanale u ndalën nga transmetimi.
Në lidhje me këtë, kompania Artmotion në një përgjigje për KALLXO.com, ka thënë se ka pasur probleme teknike.
Kompania në fjalë ishte pyetur se pse ka qenë i shfaqur shkrimi ‘ditë zie’, si dhe pse më pas janë ndalur transmetimet në kanalet e ‘Arenasport’.
“Ju informojmë se kemi pësuar disa probleme teknike të ndërlidhura me pranimin e sinjalit burimor në ditët e fundit. Kjo situatë ka shkaktuar ndërprerje të shërbimit të kanalet tona të transmetimit me datën 27.09.2023 pastaj problemi kryesor ka qenë lidhur me dëmtimin e infrastrukturës së fibrit optik, i cili është përdorur për të dërguar sinjalin televiziv tek abonentët tanë” – kanë thënë nga kompania për KALLXO.com, më 29 shtator.
“Ndërprerja e shërbimit është ndikuar negativisht në përjetimin e abonentëve tanë, të cilët janë dëmtuar nga humbja e shfaqjeve të tyre të preferuara dhe ndërprerja e shërbimit televiziv. Për fat të keq, kjo ka ndodhur në një moment të papërshtatshëm, ku shumë prej tyre kishin planifikuar të shikojnë ngjarje të rëndësishme televizive, pikërisht edhe eventet sportive” – vazhdon përgjigja.
Artmotion ka thënë se problemi teknik është detektuar dhe zgjidhur të nesërmen, pra më 28 shtator dhe sipas tyre kanalet kanë qenë aktive përsëri për abonentët.
“Pasi ne kemi rregulluar problemet aktuale, po punojmë edhe më vazhdimisht për të parandaluar situata të ngjashme në të ardhmen dhe kemi siguruar abonentët tanë që do të marrim të gjitha masat e nevojshme për të mbajtur cilësinë e shërbimit tonë të lartë dhe për të minimalizuar ndërprerjet e mundshme qe ndodhin nga faktorët e jashtëm” – thuhet më tutje në përgjigje.
Pas shfaqjes së pamjeve të tjera sonte, KALLXO.com ka dërguar pyetje të tre operatorëve dhe është në pritje të përgjigjeve.
KALLXO.com ka dërguar pyetje edhe në adresë të autoriteteve rregulluese, në Komision të Pavarur të Mediave (KPM) dhe në Autoritetin Rregullativ të Komunikimeve Elektronike dhe Postare (ARKEP), lidhur me kompetencat dhe veprimet e tyre në këtë rast por nuk ka pranuar përgjigje
Gjatë sulmit terrorist të 24 shtatorit u vra edhe rreshteri, Afrim Bunjaku, i cili u shpall “Hero i Kosovës” nga Presidentja e Kosovës, një ditë pas rënies së tij.
Ky sulm u dënua nga institucionet vendore dhe nga Bashkimi Europian e Shtetet e Bashkuara të Amerikës.
