Shqipëria nuk ka lëshuar në qarkullim kartmonedha me imazhin të Adem Jasharit

Parja më e bukur në botë!

Më 29 janar 2023, në faqen në Facebook, Kosova unike (arkiva) është publikuar një kartëmonedhe shqiptare me vlerë 3,000 lek që mban portretin e Adem Jasharit.

E njëjta është publikuar në muajin nëntor në faqet; Albanische Zeitungen (arkiva), Gazeta Shtatë (arkiva), Showbizi Shqiptar (arkiva), Mesazhi online (arkiva).

Krypometri ka kontrolluar vërtetësinë e fotos dhe ka gjetur se e njëjta është e fabrikuar duke ia vendosur portretin e Adem Jasharit.

Në ueb faqen e Bankës së Shqipërisë janë dhënë informacione se cilat kartëmonedha janë aktualisht në qarkullim dhe të dhënat tregojnë se një kartëmonedhë më vlerë 3,000 mijë lek me portretin e Adem Jasharit nuk është në qarkullim.

Më 18 dhjetor 2023, Krypometri ka kërkuar informacione nga Banka e Shqipërisë.

Nga kjo bankë kanë thënë se nuk kanë plan të hedhin në qarkullim ndonjë kartëmonedhë tjetër perveç atyre që janë ekzistuese.

“Banka e Shqipërisë me hedhjen në qarkullim të kartëmonedhave të fundit të serisë së re, 500 dhe 2,000 lek, ka realizuar përfundimisht plotësimin e serisë së re me 6 kartëmonedha. Secila prej kartëmonedhave, pjesë përbërëse e serisë me 6 prerje, ka tematikën e përcaktuar dhe pasqyruar në çdo njërën prej tyre. Aktualisht Banka e Shqipërisë nuk ka në planet e saj të shtojë në serinë e saj të sapo hedhur në qarkullim, ndonjë kartëmonedhë tjetër me kurs ligjor me përmbajtje të ndryshme nga ato që janë në duart e publikut”- thuhet në përgjigjen e dhënë për Krypometër.

Seria e re e kartëmonedhave Lekë përmban 6 prerje: 200, 500, 1000, 2000, 5000 dhe prerjen e re 10000 Lek. Kjo seri u prezantua gjatë viteve 2019 – 2022.