Postimi i rremë për sulmin me armë ndaj Policisë
Vlerësimi
Rrenë
Konstatimi se personi Besim Zeqiri ka gjuajtur në drejtim të Policisë është i pasaktë së bashku me pretendimin se i tërë grupi është arrestuar. Prokuroria e shtetit është duke e hetuar një person tjetër për këtë gjuajtje me armë zjarri i cili sipas dosjes së Prokurorisë është në arrati.
Artikulli
Më datë 11 gusht 2023 faqja e Facebook “Pelqeje faqen nese e perkrahe Albin Kurtin per kryeminister” ka publikuar një fotografi ku shihet Besim Zeqiri, i cili ishte arrestuar po atë ditë nga Policia e Kosovës nën dyshimin për kontrabandim me mallra në veri të Kosovë.
Përshkrimi i kësaj fotografie thotë “Ky shqipëfolës së bashku me grupin e tij kontrabandistësh me tri vetura dhe një furgon kanë gjuajtur me armë zjarri në drejtim të zyrtarëve të Policisë së Kosovës”.
Krypometri ka kontrolluar nëse ky informacion është i saktë.
Për të verifikuar këtë informacion Krypometri ka kontrolluar Kërkesën e Prokurorisë Themelore në Mitrovicë të datës 12 gusht 2023.
Kërkesa e cila përshkruan veprimet e secilit person veç e veç saktëson se një person ende i pa identifikuar kishte gjuajtur në drejtim të Policisë.
“I pandehuri N.N. e ka hapë derën e automjetit të tij dhe ka filluar të shtëjë me armë zjarri në drejtim të zyrtarëve policorë, ka dalë nga automjeti dhe kishte ikur në drejtim të panjohur”- thuhet në kërkesën e Prokurorisë të dates 11 gusht 2023.
Postimi i faqes Pelqeje faqen nese e perkrahe Albin Kurtin per kryeminister tutje pretendon se Policia e Kosovës është kundërpërgjigjur dhe me sukses ka arritur arrestimin e këtij grupi kriminal.
Prokuroria në dokumentin zyrtar ka konfirmuar se jo të gjithë antarët e grupit janë arrestuar gjatë këtij operacioni.
Kërkesa për paraburgim e dates 11 gusht 2023 konstaton se i dyshuari kryesor për sulm me armë ndaj policisë është arratisur.
Zeqiri i njohur si “Kaça” ishte arrestuar së bashku me vëllaun e gruas së tij Aleksandër Mihajloviq i njohur si “Acko”, Zhelko Koshanin i njohur si “Zeks”, Marko Miljkoviq dhe Jovan Gjukiq.
Që të pestë u arrestuan nën dyshime për kontrabandim me mallra në veri të Kosovës.
Ndërsa një person tjetër, N.N., dyshohet se ka gjuajtur me armë zjarri në drejtim të policëve, i cili mbeti i paidentifikuar dhe i paarritshëm për organet e rendit.
Zeqiri, në dosje thuhet se ka qenë i përfshirë në plot 34 incidente, shumica prej të cilave janë të natyrës së kontrabandimit të mallrave. Kurse i dyshuari Aleksandër Mihajlloviq ka katër incidente, natyra e të cilave nuk specifikohet. Ndërsa të dyshuarit e tjerë nuk kanë të kaluar kriminale– gjithmonë sipas dosjes së Prokurorisë.
Sipas po kësaj dosjeje, të dyshuarit kanë kontrabanduar mall nga shteti i Serbisë në Kosovë në mënyrë ilegale me qëllim të shmangies së obligimeve doganore mirëpo ishin kapur nga Policia përmes veprimeve operacionale.
Në vendin e ngjarjes janë gjetur dy gëzhoja të armës pistoletë dhe një e armës së gjatë.
Dosja thotë se pas futjes në kontroll të pesë të dyshuarve, është afruar edhe një veturë tjetër të cilën Policia e kishte shenjëzuar të ndalojë.
Sipas dosjes së siguruar nga KALLXO.com thuhet se N.N. kishte dalë nga automjeti nga i cili kishte shtënë dhe ka ikur në drejtim të panjohur. I njëjti tanimë ndodhet në arrati dhe mbetet i paidentifikuar për organet e rendit.
“Zyrtari policor i kanë dhënë shenjë të ndalet por i njëjti nuk ka përfillur urdhërat e policëve dhe ka filluar të bëjë lëvizje mbrapa duke tentuar që të godasë policët të cilët ishin pozicionuar në rrugë, gjatë lëvizjes mbrapa i pandehuri N.N. e ka hapur derën e automjetit të tij dhe ka filluar të shtëjë me armë zjarri në drejtim të zyrtarëve policor”– thuhet në dosjen e Prokurorisë.
.
