Foto e ushtares amerikane shfrytëzohet për propagandë 

Sapo u kthye mami nga një vend ku ua mora jetën disa fëmijëve të moshës tënde’

Më 8 dhjetor 2023 faqja Kur’ani-Mrekullitë e Kur’anit (arkiva) publikoi një foto të një ushtareje teksa përqafon një fëmijë me përshkrimin “Sapo u kthye mami nga një vend ku ua mora jetën disa fëmijëve të moshës tënde’, duke aluduar se ushtarja në foto ka vrarë fëmijë në vendin ku kishte qenë me mision.

Kjo foto me këtë përshkrim ka marrë 968 reagime, 85 shpërndarje dhe 42 komente, shumica duke e lidhur me situatën e fundit në konfliktin Palestinë- Izrael.

Krypometri ka gjetur se kjo foto është shfrytëzuar për propagandë të ngjashme edhe në faqe të huaja dhe përshkrimi vetëm është përkthyer në gjuhën shqipe.

Më 23 prill 2023 në faqen NATO Memes në rrjetin X kjo foto ishte shpërndarë më përshkrim “Do më mungosh bijë, do vras fëmijë të moshës tënde në lindjen e mesme”. Ky postim ka marrë 10 mijë shikime e 780 ripostime.

Krypometri ka gjetur (arkiva) se në foto është majorja amerikane Terri Gurrola duke qarë teksa përqafon vajzën e saj, Gaby. Fotografia është bërë në shtator 2007 për Associated Press. Gurrola gjatë misonit në Irak kishte qenë pjesë e ekipit mjekësor (Combat Medic) duke ndihmuar shumë persona, përfshirë edhe popullësi civile.

Majorja Gurrola shkroi për këtë foto në një artikull të botuar (arkiva) në gazetën e përditshme britanike The Guardian në tetor 2014.

 Në artikull, ajo shpjegon se sa e lumtur ishte që vajza e saj 3-vjeçare Gaby nuk e kishte harruar  gjatë kohës sa kishte qenë në Irak.

Fotoja me këtë përshkrim është postuar në një kohë kur konflikti mes Palestinës dhe Izraelit është aktual dhe çdo ditë publikohen pamje të ndryshme të viktimave si shkak i bombardimeve.