Hyseni shpjegon se në çfarë situate do të ishte e pranueshme ideja për ‘korrigjim të kufijve’

Ish-ministri i Punëve të Jashtme të Kosovës, Skender Hyseni, në një intervistë për KALLXO.com ka folur edhe rreth idesë së presidentit Hashim Thaçi për “korrigjimin e kufijve” me Serbinë.

Hyseni, i cili ka mbajtur edhe pozitën e ministrit të Brendshëm, ka thënë se është bërë shumë zhurmë, shumë debat në këtë temë dhe nga të gjitha anët.

“Unë nuk jam në dijeni që presidenti Thaçi ka prezantuar zyrtarisht një plan për ta bashkuar Luginën e Preshevës me Kosovën”, tha Hyseni.

Por, nëse kjo është e mundshme dhe e realizueshme pa u prekur territorit aktual i Kosovës, pa u prekur 10.896 kilometra katrorë sa ka Kosova, atëherë kjo le të bëhet, theksoi Skender Hyseni.

“Por, mua më duket fantastikë shkencore”, shtoi ai.

Sipas anëtarit të Kryesisë së LDK-së, lojërat me ridefinim të kufijve, e sidmos ridefinim të kufijve përgjatë linjave etnike në Ballkan, historikisht kanë prodhuar tragjedi të mëdha, luftëra të mëdha, zhvendosje massive të popullsisë dhe nuk kanë prodhuar një zgjidhje të qëndrueshme.