Gjenerali Wesley Clark Uron Kosovarët për 10 Vjetorin e Pavarësisë
Ish- Komandanti suprem i NATO-s, Gjenerali amerikan në pension, Wesley Clark, me anë të një video mesazhi ka uruar të gjithë qytetarët e Kosovës në shënimin e dhjetëvjetorit të pavarësisë.
Me anë të mesazhit, Gjenerali Clark, ka thënë se popullin e Kosovës e mban mend si ndër më të guximshmit dhe më të qëndrueshmit në Europë.
“Popullin e Kosovës e mbaj në mend si ndër më të guximshmit dhe më të qëndrueshmit në Evropë dhe po ashtu e mbaj në mend si popullin më pro-amerikan në Evropë”, ka thënë Clark.
Ai po ashtu në video mesazh ka thënë se dhjetëvjetorin e pavarësisë, populli i Kosovës duhet ta kujtoj me shumë krenari.
“Tash kur po e festoni 10 vjetorin e pavarësisë, duhet ta kujtoni me shumë krenari atë që është arritur dhe nga ju duam të shikoni drejt asaj që mbetet për t’u bërë në të ardhmen – zhvillimi ekonomik, përmirësimi i marrëdhënieve me fqinjët, mposhtja e pasigurive të së kaluarës, izolimit, ndasive dhe shtypjeve etnike, të cilat kanë mbizotëruar me shekuj në Ballkan – për t’u bërë kështu prijës të Evropës së re. Të ardhmen e keni përpara. Keni popull shumë të mirë. Keni miq shumë të mirë në Shtetet e Bashkuara. Unë besoj në të ardhmen tuaj të ndritshme”, ka thënë Clark.
Kosova nesër feston dhjetëvjetorin e pavarësisë së saj.
Për nder të kësaj dite janë organizuar shumë aktivitete.