AKK nis konferencën dy ditore rajonale ‘Kundër Korrupsionit’

Agjencia Kundër Korrupsionit organizon hapjen e punimeve të Konferencës Rajonale Kundër Korrupsionit e cila do te mbahet sot në Prishtinë.

Në Konferencën dyditore marrin pjesë drejtues të institucioneve relevante nga Shqipëria, Bosnja e Hercegovina, Italia, Kroacia, Mali i Zi, Moldavia, Turqia, përfaqësues nga organizatat të specializuara ndërqeveritare në nivel rajonal dhe më gjerë (UNDOC, OECD, UNDP), ekspertë ndërkombëtarë nga sfera e parandalimit dhe luftimit të korrupsionit, si dhe përfaqësues të institucioneve vendore për rend dhe ligj, dhe të organizatave të shoqërisë civile.

Po ashtu edhe presidenti i Republikës së Kosovës, Hashim Thaçi, merr pjesë në konferencën rajonale Kundër Korrupsionit.

Në hapjen e punimeve të Konferencës do të marrin pjesë drejtues të institucioneve shtetërore dhe përfaqësues të korpusit diplomatik në Kosovë.

Konferenca Rajonale Kundër Korrupsionit është e para këtij formati që organizohet në Kosovë dhe synon që të bëhet tradicionale përmes miratimit të një Deklarate të Përbashkët në përmbyllje të punimeve.

Konferenca ka për qëllim që të kontribuojë në forcimin e bashkëpunimit rajonal në Evropën Juglindore përmes shkëmbimit të përvojave dhe praktikave të mira në parandalimin dhe luftimin e korrupsionit.