Ministri Agani Kërkon Rregull për ‘Luginën e Diellit’
Ministri i Mjedisit dhe Planifikimit Hapësinor, Ferid Agani, ka ëkrkuar sot nga kryetari i komunës së Zveçanit, Vuqina Jankoviq, që projekti i nisur për ndërtimin e 300 shtëpive për serbët në këtë komunë t’u nënshtrohet procedura ligjore për të marrë leje.
Agani ka pritur sot në takim kryetarin e Zveçanit dhe Ministrin e Administrimit të Pushtetit Lokal, Lubomir Mariq, me të cilët bisedoi për projektin e paralajmëruar për ndërtimin e lagjes për serbët e kthyer në Zveçan.
Ministri Agani kërkoi nga kryetari Jankoviq që të ndërpriten të gjitha aktivitetet ndërtimore përkitazi me këtë projekt, deri në përmbushjen e plotë të dispozitave ligjore në fuqi, thuhet në komunikatën e MMPH-së.
Njëkohësisht, ministri Agani ofroi bashkëpunim të plotë të MMPH-së gjatë hartimit të dokumenteve të planifikimit hapësinor për Komunën e Zveçanit.
Në anën tjetër kryetari i Komunës së Zveçanit, tha se janë të interesuar të bashkëpunojnë me institucionet e Kosovës, në mënyrë që ky projekt të jetë legal dhe në përputhje me legjislacionin në fuqi duke e konsideruar si të rëndësishëm realizimin e tij.
Se ky projekt duhet të realizohen në përputhje të plotë me dispozitat ligjore të nxjerra nga institucionet e Kosovës, u pajtua edhe ministri i Administrimit të Pushtetit Lokal, Lubomir Mariq, i cili i dha mbështetje ministrit Agani në kërkesat e tij karshi Komunës së Zveçanit, thuhet në komunikatë.
