Foto: Kallxo.com
Rojet e pyllit të Blinajës pranojnë fajin për 1.2 metër kub dru
Dy rojet e pyllit në Blinajë të Lipjanit, Hashim Drenica dhe Gjemë Shala , pranuan të martën fajësinë në akuzat për keqpërdorim të detyrës zyrtare.
Prokuroria ngarkon të akuzuarin Hashim Drenica se më 27 qershor 2019 rreth orës 19:13, në vend gjuetinë me rëndësi të veçantë ‘’Blinaja’’ në Komunën e Lipjanit se me qëllim të përfitimit të dobisë pasurore gjatë orarit të punës pa lejen e organeve kompetente kishte prerë dru në sasi prej 1.2 metër kub.
Ndërsa Gjemë Shala akuzohet se në datën dhe vendin e njëjtë i kishte ndihmuar të akuzuarit Hashim Drenicës për ngarkimin e druve të prerë në vendgjuetinë me rëndësi të veçantë ‘’Blinaja’’.
Pas leximit të aktakuzës nga prokurori i çështjes Shkëlzen Ibrahimi të akuzuarit u deklaruan rreth fajësisë.
I akuzuari Hashim Drenica, pas konsultimeve me mbrojtësin e tij avokatin Naim Aliu, deklaroi se e pranon fajësinë për veprën penalë që akuzohet.
Poashtu fajësinë e pranoi edhe i akuzuari Gjemë Shala i cili tha se “e pranoj fajësinë sepse i kam ndihmuar Hashimit që t’i ngarkojë drutë në xhip poashtu pendohem shume dhe s’do ta përsëris më veprën e tillë”.
Pranimin e fajësisë nga ana e të akuzuarve e mbështeti edhe prokurori i rastit Shkëlzen Ibrahimi i cili deklaroi se “prokuroria e konsideron se pranimi i fajësisë është në përputhje të plotë me shkresat e lëndës me të cilat vërtetohet se të akuzuarit kanë kryer veprën penale që ju vihet në barrë”.
Poashtu edhe mbrojtësi i të akuzuarit Hashim Drenica, avokati Naim Shala, deklaroi se “i mbrojturi im u deklarua rreth pranimit të fajësisë pasi është konsultuar me mua”.
Trupi gjykues I përbërë nga gjykatësja Shpresa Hasaj Hysaj dhe anëtarët Lutfi Shala dhe Isuf Makolli morën vendim me të cilin e miratuan pranimin e fajësisë nga të akuzuarit Hashim Drenica dhe Gjemë Shala.
Ndërsa pala e dëmtuar Xhavit Statovci deklaroi se pasi zyra jonë ligjore ta precizojë lartësinë e dëmit do të parashtrojmë kërkesën pasuroro-juridike.
Shpallja e vendimit bëhet të mërkurën.