Millan Radoiçiq
Sulmi terrorist në Banjskë, INTERPOL lëshon fletarrestim për Millan Radoiçiqin
Organizata më e madhe ndërkombëtare e policisë, INTERPOL, ka lëshuar fletarrestim për Millan Radoiçiqin.
Burime të KALLXO.com thonë se fletarrestimi ka të bëjë me ngjarjet e 24 shtatorit 2023 në Banjskë, në veri të Kosovës.
Vepra për të cilën dyshohet Radoiçiq është terrorizmi.
Ish-nënkryetari i Listës Serbe, Millan Radoiçiq, e ka marrë përgjegjësinë për ngjarjet në Banjskë të Zveçanit të datës 24 shtator.
Në orët e para të kësaj dite një patrullë e Policisë së Kosovës ishte sulmuar me mjete shpërthyese.
Rreshteri i Policisë, Afrim Bunjaku ishte vrarë, një polic tjetër ishte plagosur dhe një tjetër ishte lënduar në këtë sulm.
Gjatë kundërsulmit nga Policia e Kosovës ishin vrarë së paku 3 pjesëtarë të grupit të udhëhequr nga Millan Radoiçiq, disa ishin arrestuar e shumica kishin ikur në drejtim të territorit të Serbisë.
Autoritetet e Kosovës grupin dhe veprimet e tij i kanë cilësuar si terroriste.
Që nga 24 shtatori dhe në ditët në vijim, forcat e Policisë së Kosovës kanë gjetur në Banjskë dhe në zonën përreth sasi të madhe të armatimit luftarak dhe dëshmi që grupi ishte mbështetur nga shteti serb.
Sulmin e grupit ndaj Policisë së Kosovës e kanë dënuar shumë shtete e organizata ndërkombëtare, disa prej të cilëve e kanë cilësuar si terrorist.
Aktualisht, Millan Radoiçiq gjendet në Serbi.