Rrahim Tërnava kandidat për kryetar të Fushë Kosovës nga PDK

Enver Hoxhaj U.D i kryetarit të Partisë Demokratike të Kosovës, ka zyrtarizuar kandidatin Rrahim Tërnava për kryetar të komunës së Fushë Kosovës.

Në një konferencë për media, Hoxhaj ka thënë se Fushë Kosova është komunë strategjike dhe se kandidat si Tërnava përfaqëson vlerat më të mira për të qenë kryetar i kësaj komune.

“Kjo është një epokë e re për PDK-në jo vetëm në Fushë Kosovë po edhe në nivel vendi. Rrahim Tërnava është shembulli më i mirë që përmes vullnetit, përmes vizionit dhe vendosmërisë ta ndryshojë jetën në Fushë Kosovë. Unë nuk njoh një komunë në këto vite të fundit ku ka pasur degradim më të madh në fushën e arsimit se sa Fushë Kosova, sidomos gjatë kohës së pandemisë”, tha ai.

“Nuk njoh komunë tjetër në Kosovë që në planin e ambientit ka më shumë papastërti se Fushë Kosova. Nuk njoh një komunë që është ndërtuar shumë e qytetarët janë të pasigurt si në komunën e Fushë Kosovës. Prandaj, Rrahim Tërnava është kandidati i duhur për t’í thënë mjaft 20 viteve të degradimit të këtij qyteti”, ka theksuar Hoxhaj.

Ndërsa, kandidati për kryetar të komunës së Fushë Kosovës nga radhët e PDK-së, njëherësh kryetar i Degës së PDK-së në këtë komunë, Rrahim Tërnava ka theksuar se në dy palë zgjedhjet e fundit, PDK në Fushë Kosovë ka pasur ngritje të votës dhe se në këto zgjedhje lokale besoj shumë se do ta marrë besimin për të qeverisur, siç ka thënë “për ta përmirësuar mirëqenien e qytetarëve”.

“Qysh sot para se të vijmë këtu, kemi filluar ta përgatisim listën për kandidatët për asamble, kemi filluar planin e punës sipas udhëzimeve të kryetarit Enver Hoxhaj. Kemi dalë në terren dhe jemi njohur me të gjitha problemet në fshatra dhe në qytet. Të gjitha këto probleme si infrastruktura, komunikacioni, sporti, arsimi, shëndetësia janë për shkak të keqmenaxhimit nga zyrtarët komunalë, sepse nuk dinë të punojnë më mirë, dhe kjo është arsyeja kryesore që më ka shtyrë të bëhem kryetar dege dhe të kandidoj tani për kryetar të komunës”, ka thënë Tërnava.

Sot gjatë ditës Partia Demokratike e Kosovës ka zyrtarizuar po ashtu kandidaturën për kryetar të Prizrenit.

Shaqir Totaj kandidati zyrtar për kryetar të Prizrenit nga PDK