Pamje - Familjarët duke dërguar furnizime në klinikat ku po trajtohen pacientët me COVID-19

1 mijë e 220 pacientë me COVID-19 aktualisht po trajtohen në të gjitha spitalet e Kosovës. Shifrat e larta të infektimit në dy javët e fundit, kanë bërë që shumë qytetarë të kërkojnë edhe ndihmën e mjekut për t’u përballur me virusin vdekjeprurës.

Sot gjatë ditës, te Klinika Infektive dhe ajo Sportive, janë parë persona duke dërguar ushqim e batanije për të afërmit që po qëndrojnë brenda klinikave, ku trajtohen pacientët me COVID-19.

Vetëm brenda Qendrës Klinike Universitare të Kosovës po trajtohen 438 pacientë me COVID-19.

“Klinika Infektive, 115 pacientë, Klinika Infektive II ( Mjekësi Sportive) 107 pacientë, Klinika Infektive III ( Interno) 87 pacientë, Klinika e Pulmologjisë 88 pacientë, Mjekimi Intensiv COVID-19, 19 pacientë, Klinika e Gjinekologjisë 17 pacientë, Klinika e Pediatrisë 5 pacientë”, njoftoi sot Shërbimi Spitalor Klinik Universitar i Kosovës.

Ditë më parë, KALLXO.com raportoi nga oborri i QKUK-së se pacientët që po trajtohen me COVID-19 po detyrohen të blejnë barna ndërsa edhe disa prej analizave detyrohen t’i kryejnë në klinika private.

KALLXO.com raportoi sot se Qeveria e Kosovës nuk e ka shpenzuar asnjë cent nga fondi i grumbulluar nga Diaspora, fond ky që ishte krijuar në kohën e ‘Qeverisë – Kurti 1’

Rreth 5 javë pasi që u shfaqë rasti i parë me COVID-19 në Kosovë, kryeministri Albin Kurti u ishte drejtuar me një kërkesë diasporës së Kosovës.

Kërkesa e kryeministrit në atë kohë ishte që të diaspora të ndihmoj Kosovën meqë po përballej me nj krizë shëndetësore e ekonomike.

“Në buxhetin e Kosovës ka rënie të të hyrave dhe në anën tjetër gjithashtu ka shpenzime të paparashikuara. Bashkatdhetarët tanë i ftojmë që ta ndihmojnë vendlindjen e tyre në këtë krizë shëndetësore”, ishte shprehur Kurti në atë kohë.

Kësaj kërkese të Kurtit iu bashkëngjit edhe fondi, i cili sot numëron rreth 720 mijë euro.

“Në llogarinë e dedikuar të hapur për fondet për menaxhimin e pandemisë, janë pranuar 717,955.93 Euro, prej te cilave nga jashtë vendit janë pranuar 667,297.70 Euro dhe brenda vendit 50,658.23 Euro”, thuhet në përgigjen e Zyrës së Kryeministrit për KALLXO.com

Mirëpo ndonëse kanë kaluar më shume se 16 muaj prej kur është hapur ky fond, ende as edhe një cent nuk është shfrytëzuar nga Qeveria e Kosovës.

Nga qeveria e Kosovës kanë treguar se disa prej mjeteve të mbledhura janë alokuar, por ende asnjë nuk është shpenzuar.

“Nga këto, shuma prej 511,681.50 Euro është alokuar te Ministria e Shëndetësisë e cila është në proces të furnizimit me pajisje mjekësore për nevoja laboratorike për menaxhimin e pandemisë. Ndërsa, shuma prej 206,274.43 Euro ende nuk është alokuar te ndonjë organizatë buxhetore. Jemi duke i shqyrtuar mundësitë dhe format se si dhe ku më së miri mund të përdoren këto mjete, në kuadër të përballjes dhe menaxhimit të pandemisë”, thuhet tutje në përgjigjen e ZKM-së.

LINK