Komuna e Vushtrrisë do të ofrojë shërbime për diasporën edhe ditën e shtunë
01.7.2023 - 20:26
Komuna e Vushtrrisë njofton se nga sot e deri më 31 gusht, do të ofrojë shërbime për diasporën edhe ditën e shtunë.
Në njoftim thuhet se enkas për diasporën janë krijuar sportele të veçanta. Derisa thuhet se shërbimet do të ofrohen çdo të shtunë nga ora 10:00 deri në orën 14:00.
“Janë shtatë zyrtarë në Zyrën e Gjendjes Civile dhe në Qendrën për Shërbim me qytetarë që do të ofrojnë shërbime”- thuhet në njoftim.
Kryetari i Komunës së Vushtrrisë, Ferit Idrizi, tha se këtë vendim e ka marrë me qëllim që bashkatdhetarët nga diaspora të mund t’i kryejnë të gjitha shërbimet për të cilat kanë nevojë në administratën e komunës.
Edhe vitin e kaluar, Komuna e Vushtrrisë ka punuar ditën e shtunë për të ofruar shërbime për diasporën.