Fotografi e manipuluar e Behgjet Pacollit

mulla Pacolli

Më 16 dhjetor 2023 faqja në Facebook, ‘A news24’(arkiva), ka publikuar një fotografi të kryetarit të AKR-së, Behgjet Pacolli me kapelë të hoxhallarëve me mbishkrimin, ‘mulla Pacolli’.

Anash fotografisë shkruan se kryeministri nuk guxon t’i lexojë letrat e Pacollit, duke iu referuar lajmit se Behgjet Pacolli i kishte shkruar një letër të hapur kryeministrit, Albin Kurtit.

Krypometër ka kontaktuar me këshilltarin e Pacollit, Jetlir Zyberaj për të verifikuar vertetësinë e postimit dhe fotografisë së Pacollit.

Zyberaj për Krypometër tha se Pacolli nuk ka publikuar ndonjë fotografi me një kapelë të tillë. Ai ka thënë se fotografia e publikuar është e manipuluar.

“Janë manipulime kibernetike. Besoj që janë për qëllime përfitimi, mashtrimi. Ky nuk është rasti i parë, ka edhe raste tjera kur përdoret imazhi për gjoja lojëra shpërblyese ose gjëra të tilla”- thuhet në përgjigjen e Zyberajt të datës 26/12/2023.

Tutje, Krypometër përmes mjeteve të kërkimit të fotografive si “Google Lens” dhe “TinEye” ka gjetur se Behxhet Pacolli, më 2 korrik të këtij viti e kishte postuar një shkrim të gjatë drejtuar kryeministrit Kurti së bashku me një fotografi.

“Letër e hapur Kryeministrit tē Kosovës Albin Kurtit. I nderuar kryeministër Kurti, E shkruaj këtë letër me dashamirësi, në interes të Republikës së Kosovës. E di që shumë nga mbështetësit tuaj, pa ndonjë arsye apo të drejtë, do të më sulmojnë, do të më ofendojnë dhe do të përpiqen të më poshtërojnë. Por kjo është Kosova e sotme, ku populizmi mposht arsyen”- fillon shkrimi i Pacollit.

Pacolli në këtë postim e kishte publikuar të njëjtën fotografi që e ka përdorur edhe faqja e facebook-ut, ‘A news24’ por, pa kapelë të hoxhallarëve.