Rezultati i ngushtë ndërmjet liberalëve dhe populistëve në zgjedhjet sllovene

Partia Demokratike Sllovene (SDS) me prirje djathtiste dhe Lëvizja Liberale e Lirisë (GS) janë në garë të ngushtë rezultati në zgjedhjet parlamentare të Sllovenisë të së dielës (22.03.2026), sipas rezultateve preliminare të komisionit shtetëror zgjedhor, bazuar në numrin më të madh të votave të numëruara, raporton Reuters.

Asnjëra parti – madje as me partnerët e saj ekzistues të koalicionit – nuk duket se do të sigurojë 46 mandatet  e nevojshme për shumicën në parlamentin me 90 deputetë, duke i bërë partitë më të vogla që kalojnë pragun prej 4% si vendimtare potenciale.

Bazuar në 99.45% të fletëvotimeve të numëruara, GS-ja ka fituar 29 mandate, pasuar ngushtë nga SDS-ja me 28 deputetë. Së bashku me partitë mbështetëse, GS-ja e udhëhequr nga kryeministri në detyrë Robert Golob do të kishte 40 deputetë, ndërsa SDS, e udhëhequr nga ish-kryeministri populist, Janez Jansha, do të kishte 43 mandate.

“Ne të gjithë i besuam një partie, pavarësisht se çfarë besojmë”, u ka thënë tha Golob mbështetësve pasi rezultatet paraprake e nxorën GS-në në epërsi. “Ne të gjithë meritojmë një të ardhme dhe unë jam këtu tani për të thënë se me këtë mandat do të bëjmë gjithçka për ta bërë atë të ardhme më të mirë për të gjithë qytetarët tanë”.

Jansha, i cili kandidonte për mandatin e katërt si kryeministër, akuzoi komisionin zgjedhor për ndërhyrje në numërim, duke thënë se ekipi i tij i monitorimit ka vënë re mospërputhjen prej 50 mijë votash për SDS-në.

“U bëj thirrje atyre që janë përgjegjës në komisionin kombëtar zgjedhor, atyre që menaxhojnë programin kompjuterik, të kuptojnë se unë do të rinumëroj çdo votë nga të gjitha qendrat e votimit nëse organizohemi në përputhje me rrethanat”, ka deklaruar ai për një televizion lokal.

Analisti politik, Aljaz Pengov Bitenc, dyshon se mund të formohet një qeveri e qëndrueshme, por mendon se Golob është në pozicion më të mirë se Jansha për të negociuar me partitë nga një spektër më i gjerë.

“Pres negociata shumë të gjata koalicioni sepse përcaktimi i prioriteteve do të jetë detyrë e vështirë përpara dhe do të kërkojë hise e madhe durimi, mençurie dhe përvoje politike”, ka theksuar ai.

Përcaktimi i së ardhmes së Sllovenisë

Të dy kampet kanë thënë se zgjedhjet do të përcaktojnë rrugën e ardhshme për Slloveninë. Nën drejtimin e Golobit, vendi ka zbatuar demokraci liberale dhe pro-europiane të përqendruar në reformat sociale, ndërsa Jansha dëshiron të prezantojë lehtësime tatimore për bizneset dhe të ulë fondet për OJQ-të, mirëqenien dhe median.

Golobi e përafroi politikën e jashtme sllovene me vendet europiane që mbështetën një shtet të pavarur palestinez, ndërsa Jansha, aleat i kryeministrit nacionalist hungarez, Viktor Orban, dhe mbështetës i presidentit të SHBA-së, Donald Trump, do të ndryshonte përafrimin ndërkombëtar të vendit.

Fushata zgjedhore u nxeh këtë muaj kur video të fshehta u publikuan në një faqe interneti anonime që supozohej se ekspozonin korrupsionin qeveritar.

Një raport këtë javë pretendonte se Jansha u takua me zyrtarë nga firma private izraelite e spiunazhit “Black Cube”, të cilën LinkedIn pretendoi në vitin 2023 se ishte pas një fushate me kamera të fshehta që synonte aktivistët dhe gazetarët në prag të zgjedhjeve të Hungarisë në vitin 2022.

Përgatiti: Rexhep Maloku – Kallxo.com