Primozh Gliha emërohet kryetrajner i kombëtares së Kosovës në futboll
Federata e Futbollit të Kosovës (FFK), ka njoftuar se ka emëruar Primozh Gliha kryetrajner të Kosovës, për ndeshjet e mbetura kualifikuese në kuadër të Euro 2024.
Përmes një komunikate për media, FFK-ja ka bërë të ditur se ndihmës të kryetrajnerit do të jenë Afrim Tovërlani, Arbnor Morina, Ahmet Beselica dhe Thomas Richards.
“KE i FFK-së ka vendosur që t’ia besojë drejtimin e Dardanëve ekipit të brendshëm të trajnerëve që tashmë janë të angazhuar në ekipet kombëtare. Ata njëherësh do të qëndrojnë në ekipet e grupmoshave që i drejtojnë, por do të jenë të angazhuar për të ndihmuar përzgjedhësin Gliha në Kombëtaren A” – thuhet në komunikatën e FFK-së.
Emërimi i Gliha në krye të Kosovës, vjen pas largimit të Alain Giresse në qershor të këtij viti, pas rezultateve të dobëta të Kosovës në ndeshjet kualifikuese për Euro 2024.
