Prokurorët e EULEX-it 'Do Ta Monitorojnë' Rastin e Akuzave ndaj Lumezit
Misioni i Bashkimit Europian për Sundim të Ligjit në Kosovë, EULEX, konfirmoi sot se i është kërkuar ta marrë përsipër hetimin e dyshimeve për falsifikim të dosjes së provimit të jurisprudencës të Kryeprokurorit të Shtetit, Aleksandër Lumezi.
Një zëdhënëse e EULEX-it konfirmoi për KALLXO.com se Misioni “do ta monitorojë” këtë rast.
Tash e dy javë, Lumezi është nën presion të opinionit për të dhënë sqarime rreth dyshimeve që janë ngritur për provimin e tij të jurisprudencës, të vitit 1991.
Kjo çështje është trajtuar sot edhe në takimin e ministrit të Drejtësisë, Abelard Tahiri me shefen e EULEX-it, Alexandra Papadopoulou.
“Është e rëndësishme që supozimet t’i lënë hapësirë fakteve konkrete dhe që ky proces verifikimi të përfundoj sa më parë në mënyrë që të zbardhet e vërteta dhe të ruhet kredibiliteti i institucioneve tona”, thuhet në postimin e Tahirit në Facebook pas këtij takimi.
Por zëdhënësja e EULEX-it, Dragana Solomon, tha se EULEX do ta monitorojë këtë rast.
“Në linjë me mandatin aktual, prokurorët e EULEX-it nuk marrin raste të reja përderisa nuk përmbushen rrethanat e jashtëzakonshme. Akuzat do të merren përsipër nga autoritetet kompetente të prokurorisë së Kosovës. Prokurorët e EULEX-it kanë pranuar dhe shqyrtuar kërkesën e z. Lumezi. Misioni do ta monitorojë rastin. Shefja e Misionit të EULEX-it e ka thënë këtë qëndrim në takimin e rregullt që ka pasur me Ministrin e Drejtësisë të Kosovës, Abelard Tahiri”.
Disa ditë më parë, ishte Enver Hasani, ai që deklaroi se Aleksandër Lumezi ka falsifikuar provimin e jurisprudencës, para se kjo çështje të marrë jehonë në media.
Shënim: Artikulli është plotësuar për ta pasqyruar më detajisht qëndrimin e EULEX-it rreth këtij rasti.