Barbano: EULEX-i është i shqetësuar nga ndalimi i zv.drejtorit të Policisë së Kosovës në Serbi

Janë bërë gati 48 orë prej kur zëvendësdrejtori i përgjithshëm i Policisë së Kosovës, Dejan Jankoviq, është ndaluar nga autoritetet e Serbisë.

Për të njëjtin ka reaguar edhe shefi i Misionit të Bashkimit Europian për Sundim të Ligjit (EULEX), Giovanni Pietro Barbano.

Ai ka thënë se EULEX në Kosovë është i shqetësuar për ndalimin e Jankoviqit.

“Ne u bëjmë thirrje të gjithë atyre që janë të përfshirë që t’u përmbahen parimeve të sundimit të ligjit gjatë gjithë procesit” –  tha Barbano.

#EULEX Kosovo is concerned about the ongoing detention of the Deputy General Director of Kosovo Police, Mr. Dejan JANKOVIC in Serbia. We call on all those who are involved to adhere to the rule of law principles throughout the process.

— Giovanni Pietro Barbano (@EulexHoM) April 18, 2024

Edhe ambasadori i SHBA-s në Kosovë, Jeffrey Hovenier, është shprehur i shqetësuar për ndalimin e zëvendësdrejtorit Jankoviq.

Këto deklarata ambasadori amerikan i dha para mediave pas takimit që pati me presidenten Vjosa Osmani më 18.04.2024.

“Jankoviq është i njohur mirë nga Ambasada Amerikane dhe shumë të tjerë. Ne jemi veçanërisht të shqetësuar. Ai është dikush që e njohim prej shumë vitesh. Ai ka shpenzuar shumë energji dhe kohë në Polici duke ndihmuar shumë në integrimin e komunitetit serb në Policinë e Kosovës dhe ruajtjen e trashëgimisë kulturore të Kosovës. Ne jemi të shqetësuar dhe shpresojmë që të lirohet shpejtë” – ka thënë ambasadori Hovenier.

Më 17.04.2024, Ministria e Punëve të Brendshme e Kosovës njoftoi se 10 pjesëtarë të Policisë së Kosovës (shqiptarë dhe serbë) janë ndaluar në kalimet kufitare Merdarë, Jarinje, Dheu i Bardhë dhe në kufirin mes Kroacisë dhe Serbisë.

Të gjithë janë liruar, përveç zëvendësdrejtorit i përgjithshëm të Policisë, Dejan Jankoviq. Më 18.04.2024, Kurti ka thënë se zëvendësdrejtori i Policisë së Kosovës nga radhët e komunitetit serb, Dejan Jankoviq, vazhdon të mbahet në burg në Serbi.

Hovenier: Jemi të shqetësuar për ndalimin e zëvendësdrejtorit të Policisë, Jankoviq