Paralajmërohet rritja e çmimit të bukës edhe në Mitrovicë

Drejtuar nga kryetari i komunës së Mitrovicës, Agim Bahtiri, sot është mbajtur mbledhja e radhës e Bordit të Drejtorëve të kësaj komune, në të cilën janë diskutuar dhe shqyrtuar çështje të rëndësishme nga fushëveprimi i Bordit dhe drejtorive komunale.

Sipas një komunikatë për medie në këtë mbledhje drejtori i Inspeksionit, Hysni Ahmeti, ka njoftuar se ka zhvilluar një takim me furrtarët e kësaj komune, ku ka thënë se pesha e bukës është në nivel, “mirëpo furrtarët po kanë probleme me furnizim me miell prandaj ekziston mundësia që edhe në qytetin tonë të shtrenjtohet çmimi i bukës”.

Po ashtu ai njoftoi së janë duke inspektuar të gjitha marketet për të evidentuar produktet të cilat mund të kenë mbishkrimin “Kosovo i Metohija” ,“Kosovë/o UNMIK” apo “Kosovo/a Rezoluta 1244”, apo çdo emërtim tjetër i cili është në kundërshtim me emërtimin zyrtar të Republikës së Kosovës duke larguar ato menjëherë nga tregu.

Kurse, drejtori për Kulturë, Rini dhe Sport, Tafil Peci, i njoftoi anëtarët e bordit se me rastin e festës së 28 nëntorit është bërë stolisja e qytetit me flamuj kombëtar ndërsa ka paralajmëruar një agjendë të pasur pikërisht kushtuar ditës së flamurit kombëtar.

Drejtori Peci, tha se të mërkurën do të mbahen homazhe pranë varrezave të dëshmorëve në Shipol për të vazhduar tek shtatoret e dëshmorëve Avni Shabani, Fehmi dhe Xhevë Lladrovci, Fatime Hetemi, Artim Jashari, Safet Boletini, Shemsi Ahmeti, Mehë Uka, heroit kombëtar Isa Boletini, pastaj do të ketë vizitë edhe në kullën e Isa Boletinit dhe në mbrëmje në sheshin e qytetit do të ketë edhe një koncert festiv ku do të përformojnë këngëtarët tanë më të njohur.

Kurse, drejtori i Arsimit, Iset Beka, njoftoi ekzekutivin për programin nacional me nxënës dhe të rinj i cili tashmë do të organizohet nga Ministria për Arsim, Shkencë dhe Teknologji, ku të gjitha garat e volejbollit, gjuhës dhe letërsisë, artit, të matematikës, do të organizohen në nivel shkollor, komunal, republikan si dhe ndërshtetëror.