Mësuesja braktis nxënësit, gjen punë tjetër

Ndonëse ka nisur java e dytë e procesit mësimor, nxënësit e klasës së katërt të shkollës fillore “Enver Hadri” në fshatin Smrekonicë të Vushtrrisë nuk po mund të mbajnë mësim të rregullt. Kjo për shkak se ata kanë mbetur pa mësuese.

Njëri nga prindërit, fëmija i të cilit ndjek mësimin në këtë shkollë, ka raportuar në redaksinë e KALLXO.com se fëmijët nuk janë duke mbajtur mësim të rregullt në mungesë të mësueses.

KALLXO.com ka kontaktuar drejtorin e shkollës, Nehat Abazin.

Ai tregon se mësuesja e klasës është në pushim të lehonisë, ndërsa mësuesja e cila e zëvendësonte atë ka gjetur një vend tjetër të punës.

“Mësimi është duke u mbajtur por jo në mënyrë të rregullt. Po mbahet me zëvendësime të mësuesve të tjerë”, tha Abazi për KALLXO.com.

Ndërsa, Afrim Namani, drejtor i Arsimit në Komunën e Vushtrrisë tha për KALLXO.com se Komuna ka hapur konkursin për këtë pozitë.

“Drejtoria Komunale e Arsimit në Vushtrri ka shpallur konkurs për këtë vend pune me datën 4 shtator. Po bëjmë përpjekje që shumë shpejt të kryejmë procedurat e rekrutimit”, thuhet në përgjigjen e Drejtorisë.

Sipas Namanit kjo ka ndodhur për shkak se mësimdhënësja e ka lëshuar vendin e punës pa paralajmërim.