Pallati i Drejtësisë - Foto: KALLXO.com
Bastiset Punëtori i Shkrimores së Gjykatës Supreme
Administratorja e Gjykatës Supreme të Kosovës, Ajna Gashi, ka konfirmuar për KALLXO.com se Policia ka kryer bastisje në këtë Gjykatë.
“Policia ka qenë, ata e kanë marrë një punëtor të shkrimores”, ka thënë Gashi.
Ajo nuk ka dhënë detaje për arsyet e bastisjes në Gjykatën Supreme.
Bastisjet janë konfirmuar edhe nga Policia e Kosovës.
“Drejtoria për hetimin krimeve ekonomike dhe korrupsionit është duke realizuar një operacion policor në funksion të zbatimit të urdhëresës së Gjykatës me ç’rast janë duke u bastisur dy lokacione në Prishtinë”, tha për KALLXO.com zëdhënësi i Policisë, Daut Hoxha.
Më vonë, Gjykata Supreme ka njoftuar përmes një komunikate se Policia ka bastisur dhe arrestuar referenten e Gjykatës,B.H., nën dyshimin për shpërdorim të detyrës zyrtare.