Foto: Policia e Kosovës
Laboratori i drogës në Leposaviq, Prokuroria kërkon paraburgim për të pandehurin
Policia e Kosovës ka zbuluar në Leposaviq një laborator për kultivimin e bimëve të dyshuara të kanabisit në fshatin Miokovicë më 07.05.2024.
Në lidhje me këtë rast, Prokuroria e Mitrovicës ka paraqitur kërkesë për caktimin e paraburgimit për të pandehurin M.I., pasi ekziston dyshimi i bazuar se ka kryer veprat penale – prodhimi dhe përpunimi i paautorizuar i narkotikëve substancave psikotrope, analoge apo veglave, pajisjeve apo materialeve narkotike.
Sipas një komunikate për media, gjatë kontrollit në shtëpinë e të pandehurit M.I. janë gjetur mbi 400 bimë të dyshuara të kanabisit dhe janë sekuestruar pushkë me dy tyta të gjata, fishekë për pushkë gjuetie, një fishek për armë të gjatë, dy radiolidhje, adapterë për radiolidhje, një xhaketë – uniformë e Policisë së Kosovës në të cilën kishte doreza të zeza.
“Gjatë kontrollit në shtëpinë e të pandehurit M.I., në fshatin Miokovicë, komuna Leposaviq janë gjetur dhe sekuestruar pushkë me dy tyta të gjata, fishekë për pushkë gjuetie, një fishek për armë të gjatë, dy radiolidhje, adapterë për radio lidhje, një jakne e uniformës së Policisë së Kosovës në të cilën kishte doreza të zeza, maskë për mbulimin e fytyrës dhe syza të zeza, ndërsa në objektin përcjellës laboratori i improvizuar për kultivimin e narkotikëve, ku janë gjetur katërqindeshtatë (407) bimë të dyshuara të Kanabisit, me gjatësi prej 5-13 cm, nëntë (9) gramë të dyshuar të substancës narkotike, si dhe mjete tjera që shërbejnë për kultivimin e bimëve narkotike”- thuhet të komunikatë.
Në njoftim bëhet e ditur se seanca dëgjimore për caktimin e masës së paraburgimit ndaj të pandehurit pritet të mbahet në Gjykatën e Mitrovicës.
Operacioni policor i datës 07.05.2024 ka rezultuar me gjetjen e gjithsej 409 bimëve të dyshuara të kanabisit, një pushkë gjuetie me 43 fishekë, si dhe pajisje të tjera të cilat nevojiten për improvizimin e laboratorit (poçe, ventilim, termostate, nxehëse, etj.), si dhe një xhaketë e Policisë së Kosovës.
