Nënshkrimi i marrëveshjes për hapjen e pikës së re kufitare mes Kosovës dhe Maqedonisë në Stançiq – Foto: KALLXO.com
Anamorava i Gëzohet Pikës Kufitare të Stançiqit
Sipas nënkryetarit të Komunës së Gjilanit, Rexhep Kadriu, me këtë pikë kufitare rruga Gjilan-Kumanovë është për afro 50 kilometra më e shkurtë.
“Komuna e Gjilanit ka qenë e angazhuar prej fillimit në këtë proces dhe jemi marrë me shpronësimet, të cilat i kemi kryer me kohë”, tha për KALLXO.com nënkryetari Rexhep Kadriu.
“Nuk kemi pasë problem për shpronësim të tokave, janë kryer gjitha procedurat dhe jemi të gatshëm me fillimin e punimeve. Procedurat e tenderimit janë kryer nga Komisioni Europian dhe pritet të fillojnë punimet shumë shpejt”, shtoi ai.
Sipas Kadriut, hapja e pikës së re kufitare mes dy vendeve i afron shumë Gjilanin me Kumanovën.
“Përparësitë janë jashtëzakonisht të mëdha sepse qytetarët që kanë dashtë me ardhë nga Kumanova, ose ne me shku në Kumanovë, është dashtë me i kalu 87 kilometra. Ndërsa tash e kemi rrugën 37 km”, theksoi Kadriu.
Gjithashtu, sipas Kadriut, banorët që kanë lidhje familjare mes dy vendeve e kanë pritur jashtëzakonisht mirë lajmin për hapjen e pikës së re të kufirit, e cila, sipas tij, deri në vitin e ardhshëm pritet që të funksionalizimet.
Fillimisht kjo pikë kufitare do të menaxhohet nga Komisioni Europian ndërsa nëpër të do të lejohet qarkullimi i automjeteve vetëm deri në 3.5 tonë.
