Marrëveshja e rektorëve | Foto: KALLXO.com
Afrohen Universitetet e Tiranës dhe Prishtinës
Marrëveshja e nënshkruar nga Marjan Dema e Mynyr Koni përfshin krijimin e programeve të përbashkëta studimore, shkëmbimin e studentëve dhe profesorëve si dhe shfrytëzimin e infrastrukturave dhe të laboratorëve.
Rektori i Universitetit të Prishtinës Marjan Dema tha se Universiteti i Tiranës do t’i ndihmojë Universitetit të Prishtinës edhe për të përfituar nga projektet e ndryshme evropiane.
“Ne të gjithë e dimë se për shkak të statusit të Kosovës ne nuk kemi të drejtë për shfrytëzimin e projekteve të ndryshëm si për shembull nga ‘Horizont 2020’,” tha Dema.
Rektori i Universitetit të Tiranës Mynyr Koni zbatimin e marrëveshjes së nënshkruar e lidhi me precizitetin e profesioneve të tij dhe Demës.
“Ne jemi të dy rektorë të rinj të sapozgjedhur dhe ky moment është moment i rëndësishëm për të dy dhe jemi të së njëjtës fushë të shkencave të matematike-natyrore dhe jemi të dy korrektë, fjalëpakë dhe punëshumë,” tha ai.
Dema më tutje tha se universitetet në Prishtinë e Tiranë duhet të punojnë që të rangohen sa më lartë edhe jashtë hapësirave me shqiptarë.
“Jo vetëm të krijomë dy universitete të cilat janë elitare në hapësirat etnike, por imazhin e këtyre dy universiteteve ta ngremë edhe në rajon dhe në vendet evropiane,” tha Dema.
Ndërsa rektori i Universitetit të Tiranës Mynyr Koni tha se bashkëpunime të tilla do të vazhdojnë edhe në të ardhmen.
Në shtator të këtij viti ekipet nga ana e dy universiteteve do të bëhen bashkë për të përpiluar edhe një projekt të përbashkët.