Vrasja e Triumf Rizës, Ilir Abdullahut i vazhdohet paraburgimi edhe për dy muaj
Ilir Abdullahut, i dyshuar lidhur me vrasjen e policit Triumf Riza, i është vazhduar masa e paraburgimit edhe për dy muaj.
Lajmin për KALLXO.com e ka konfirmuar zëdhënësja e Gjykatës së Prishtinës, Mirlinda Gashi.
“Referuar kërkesës tuaj për informata, ju njoftojmë se pas kërkesës së Prokurorisë Speciale të Republikës së Kosovës për vazhdimin e masës së paraburgimit në çështjen penale kundër të pandehurit I.A. Gjykata Themelore në Prishtinë – Departamenti Special me datë 02.02.2024 ka aprovuar kërkesën e PSRK-së dhe të pandehurit I.A. i është vazhduar masa e paraburgimit në kohëzgjatje prej dy muaj”- thuhet në përgjigjen e Gashit.
Abdullahu, i njohur me nofkën “Liza”, ishte liruar nga paraburgimi nga Gjykata e Prishtinës pasi kishte dhënë 100 mijë euro dorëzani.
Ndryshe, Gjykata e Apelit, më 3 nëntor 2023 e ka kthyer në paraburgim Ilir Abdullahun, i dyshuar për vrasjen e policit Triumf Riza. Ky vendim është marrë nga kolegji i përbërë nga gjyqtarët Bashkim Hyseni – kryetar i kolegjit, Afërdita Bytyçi dhe Vaton Durguti – anëtarë.
Në arsyetimin e Gjykatës së Apelit thuhej se në ankesën e Prokurorisë Speciale pretendohet se aktvendimi për masën e dorëzanisë është në shkelje të dispozitave të procedurës penale. Kjo për faktin se për caktimin e kësaj mase duhet të ekzistojë dyshimi i bazuar dhe se baza e vetme është rreziku i ikjes andaj Prokuroria ka vlerësuar se nuk janë plotësuar kushtet ligjore për caktimin e masës së dorëzanisë ndaj të njëjtit.
Gjykata e Apelit kishte vlerësuar se ankesa e PSRK-së është e bazuar dhe se Gjykata e shkallës së parë nuk ka dhënë arsye të mjaftueshme lidhur me proporcionalitetin dhe përshtatshmërinë e kësaj mase.
Andaj edhe zëvëndësimi i masës së paraburgimit me masën e dorëzanisë në vlerë prej 100 mijë euro për të pandehurin nuk është i drejtë dhe i ligjshëm dhe se i pandehuri Abdullahu duhet të kthehet në paraburgim.
Gjykata Supreme e Kosovës e kishte vërtetuar vendimin e Gjykatës së Apelit që Ilir Abdullahun ta kthejë në paraburgim.
Gjykata Supreme e kishte refuzuar ankesën e avokatit të Abdullahut, Ramë Dreshaj, i cili kishte parashtruar ankesë kundër vendimit të Gjykatës së Apelit që të dyshuarin ta kthejë në masën e paraburgimit.
Ilir Abdullahu, i njohur si “Liza”, dyshohet për veprën penale – vrasje e rëndë që ishte kryer më 30 gusht të vitit 2007 në Prishtinë, ku i vrarë kishte mbetur Triumf Riza, pjesëtar i Policisë së Kosovës.
Për vrasjen e Triumf Rizës është dënuar Arben Berisha, kurse Enver Sekiraqa është duke u gjykuar ende për nxitje të vrasjes së Triumf Rizsës.
